Jat jơnau yal mhar bơh Anih duh broă Làng bol sàh Yang Mao, dơ̆ mìu dờng jŏ jòng tàm ală ngai do neh lơh hoàc huơr kơn jơ̆ ngan tàm jơh ù tiah do dê. Kờp jơh hoàc huơr bơh sơn rờp kờp dŭ lài rlau 40 tơmàn đong. Tơnơ̆ tŭ iăt jơnau yal mờ lòt sền ngan ngồn tàm ală tiah tơrlah ù kơn jơ̆ ngan, ồng Tạ Anh Tuấn, Củ tịc Anih duh broă Làng bol càr Dăk Lăk đơs là sàh Yang Mao pơn jat geh bơta pơhìn tơrlah ù bơh khà dà gơ trăm uă ngan, ù tiah kơh mờ uă tiah là dòr bơnơm.

Tàm tiah lòt sền, Củ tịc Anih duh broă Làng bol càr sồr gơnoar atbồ sàh jơh nùs lơh ngan ntrờn jơh làng bol ơm kis tàm tiah sơbơng roh, is ồn là rlau 20 hìu bơnhă gam ơm tàm tiah geh pơphìn sơnơng roh uă ngan. Broă ntrờn pal geh lơh jat mơ, ờ gơn dà hoàc soăt.

Phó Củ tịc Anih duh broă Làng bol càr Gia Lai ồng Dương Mah Tiệp pa kĭ ai tơlik sră pơyua sồr ală sàh, sơnah ƀòn, sờh, gah broă lơh tàm càr rơcang lài lam lơh ală broă lơh drơng mờ mìu dờng, dà tih mờ tơrlah ù, nàng kờñ tơrmù ƀà hoàc huơr tài bơh trồ tiah lơh aniai.

Jat sră pơyua, Anih duh broă Làng bol ală sàh, sơnah ƀòn pal jat sền nền nòn ală jơnau yal tơnggit tơngkah lài, jơnau đơs lài mìu sơr; jơnau yal bè tam pà dà tàm ală tơnau dơng dà, jơnau pơhìn dà tih, ngơr bam, dà kŏ dà cò, tơrlah ù… mờ di tŭ yal tus gơnoar atbồ ƀòn lơgar, làng bol in nàng rơcang lài pleh. Ală sàh, sơnah ƀòn rơcang lài ntrờn làng bol lik bơh tiah sơbơng roh, rơcang lài wil tơl phan sa, phan ngui pal geh tàm anih ơm pleh, ngan là tàm ală tiah geh jơnau pơhìn tơrlah mờ ngơr bam jrô. Mpồl lơh broă, phan bơna, măi mok geh sồr rơndap ai jat jơnau đơs “4 tơn tàm dùl anih” nàng rơcang lài drơng mờ mìu dờng jŏ jòng, ngan là tàm ală tiah digơlan gơtìp dà wềl, tam cah is.

 Mìu dờng dà kŏ dà cò tàm Khánh Hoà neh lơh 8 nă cau chơ̆t, 2 nă cau roh thĭt, 19 nă cau sồt să; rlau 7 rơbô lồ kòi mờ phan lơyah ngai ngơr jrô tàm dà; uă broă lơh bơt bơtàu ờ diơng. Tàm dơ̆ pơrjum mhar đơng lam broă lơh bơsong jơnau gơ lời wơl tài bơh mìu dờng dà kŏ dà cò, Ƀí thư Tỉñ ủy càr Khánh Hòa ồng Nghiêm Xuân Thành sồr Sờh Lơh sơnơm ai ƀák sìh, phan bơna măi mok sơm sồt ờ sa priă ai cau gơtìp rềs àr in; ngui broă lơh kes priă dong kờl làng bol gờñ bè ờs wơl rài kis.

Ồng Nghiêm Xuân Thành đơs sùm mìng ai lòt rê tŭ ngan ngồn geh bơta lơngăp lơngai; mpồl cau dong kờl rềs àr pal pơgồp bal niam, gàr niam lơngăp lơngai tàm broă lòt jòi. Ală tiah ờ pràn pal rcang tơl làm rơndeh rơndồ phan bơna dong kờl rềs àr, ngui tam gơl sồ tàm yal tơngĭt lài mờ drơng mờ mìu dờng dà kŏ dà.