Tềng đap bơta mìu dà tih dà lìu dờng ngan ờ hềt geh bơh lài tus tŭ do lơh gơbàn ngơr bam jrô mờ gơ wềl, koh gơl uă tiah tàm tiah đah mat tơngai lik càr dê, drim ngai 20/11, càr Dăk Lăk geh sră pơyua hòi jà jơh gùt kwang bàng, đảng viên, làng bol mờ ală mpồl lơh sa kă bro at tê bal dong kờl làng bol tiah dà tih dà lìu. Tàm dơ̆ pơrjum Mpồl đơng lam rơcang gàr làng bol drim ngai 20/11, Ƀí thư Tỉñ ủy càr ồng Lương Nguyễn Minh Triết sồr ai jơh ală mpồl lơh broă, phan bơna dong kờl kòn bơnus, mut tàm tiah gơ wềl, ai lài ka nô dềt jun phan sa mut tàm ală tiah Tây Hòa, Phú hòa, Đông Hòa. Mpồl Ling tiah 5 neh ai rlau 100 nơm ka nô mờ bơ tơl tai phan bơna bơh uă gah. Ling tiah 5 neh lòt sền ƀlàng rơndeh par Tuy Hòa nàng gàr tơl bơta niam wă rơndeh par duk drơng broă tơdùh phan dong kờl.

Mìu sơr ngan bơh mang ngai 15 tus ngai 20 nhai 11 neh lơh dà tàm dà dờng Ba, Kỳ Lộ, Bàn Thạch mờ dà dờng Srepok gơguh tih mhar ngan bơh lài tus tŭ do, lơh gơbam jrô mờ koh gơl uă tiah tàm đah măt tơngai lik càr Dăk Lăk. Gùt càr dờp geh 33 rơbô 630 nơm hìu gơtìp gơbam, rơlao 11 rơbô 500 hìu kơrian is, 11 rơbô 242 hìu pal ntrờn mhar. Mpồl ling sền gàr tiah nhàr lơgar, Kwang àng càr bal mờ mpồl ling tus bơh Ling tiah 5, Ling dà lềng gam rề ơnàng tiah dong klàs, lơh anih yal lài tàm ală tiah gơtìp ngòt rơngơ̆t. Anih duh broă Làng bol càr neh dong kờl jal mhar 30 tơmàn đong ai 60 sàh, sơnah ƀòn in nàng lơh jăt broă rơcang kơrian mờ bơsong hoàc huơr lài ngan.

Drim ngai 20/11, Anih duh broă Làng bol càr Gia Lai neh pơrjum jal mhar bè bơta mìu dà tih lơh gơbàn ngơr bam kơn jơ̆ ngan tàm tiah đah mat tơngai lik. Tŭ do, mờr 20 rbô hìu bơnhă làng bol gơtìp gơ rềng, mờr 11 rbô dơ̆ cau geh ntrờn jal mhar. Mpồl kwang àng, ling klàng mờ ală mpồl dong kờl rềs àr neh sồr rlau 5 rbô nă kwang bàng, cau ling, ai 15 nơm ka nô, 43 nơm rơkì măi mờ git nđờ rhiăng nơm phan bơna dong kờl ntrờn, dong kờl rềs àr, gàr niam lơngăp lơngai, rơndap tap sèng. Jơh ală hìu bơsram tiah đah mat tơngai lik càr pal ai kơnòm bơsram ơm rlô bơsram ing mờ geh ngui nàng lơh anih ntrờn làng bol.

Ngai 20/11, càr Khánh Hoà sơn đờ hòi jà ơhò, rơkì pơn diang năc lòt nhơl bơh làng bol dê nàng dong kờl ală tiah gam gơtìp kơrian is tài gơbam dà jrô. Mpồl lơh broă geh gơnoar tam pà gơs uă mpồl nàng tus tàm ală tiah gơtìp uă, pơgồp bal mờ Ling đặc công dà, ling klàng bal mờ kwang àng jun làng bol lik tiah ngòt rơngơ̆t, mờ pơn diang phan sa, dà hùc, phan pơr đồng tus tơl hìu in. Củ tịc Anih duh broă Làng bol càr ồng Trần Phong sồr Sờh Kă bro phan mhar blơi ƀung mi tàm ală drà nàng tam pà, mờ ngui uă ngan ơhò, rơkì làng bol nàng tus tơl ală tiah gơtìp gơbam dà jrô.