Mang òr (23/11), Thủ tướng ồng Phạm Minh Chính bal mờ Pơ-ùr mờ mpồl kwang bàng ala măt kấp dờng lơgar Việt Nam neh rê bơh lơgar Nam Phi, tơn jơh broă tus bal Pơrjum kấp dờng G20 nam 2025 mờ uă broă lơh bal bàr đah dê.

Mờ gơnoar broă là Năc jà bơh Củ tịc mpồl G20 dê, Thủ tướng tus bal ală broă lơh tàm Pơrjum kấp dờng mpồl G20 bal mờ kwang đơng lam bồ ală lơgar tàm mpồl, lơgar năc jà mờ mpồl lơh broă ală lơgar dê. Tàm bàr dơ̆ cri bơyai bè broă bơtàu tơnguh kơl jăp, tơrgùm bal mờ pơgồp bal bơh mpồl G20 dê ai geh dùl dunia pràn is, Thủ tướng sồr mpồl G20 lơh pràn lơh broă bal ală lơgar git jơnau bal tàm adăt boh lam, bơsong tam lơh, geh sùm broă kă bro phan uă gah broă mờ mpồl WTO lơh tờm, gàr niam mpồl priă jền loh làng, ndrờm bal; mờ ai geh bơta niam bơtàu tơnguh tàm broă tam gơl sồ, tam gơl tơlir. Di tàm dơ̆ do, lơgar Việt Nam mờ lơgar Nam Phi yal bơr tơnguh kấp git gơ̆p tus Tam klăc bal Jŏ jòng, lơh pràn lơh broă bal tàm gah lơh sa, kă bro phan, bơcri priă, wèt tus jơnau kờñ ai khà priă kă bro phan đah bàr lơgar geh bơh 4 tus 5 tơmàn dolar Mỹ tàm bơh 2 tus 3 nam tus.