Drim òr (20/10), tàm Pơrjum dơ̆ 10, Quốk hội khoă XV, Thủ tướng Cíñ phủ ồng Phạm Minh Chính neh yal cồng nha lơh jăt Broă rơndăp lơh bơtàu tơnguh lơh sa mpồl bơtiàn nam 2025, tơngai bơh nam 2021 tus 2025 mờ kờp dŭ lơh broă rơndăp lơh nam 2026.

Thủ tướng đơs nền, tơngai lơh broă pa do là tơngai bơh bồ tơngoh pràn kơl dang, nùs nhơm kơ̆ dơn, bơta ngăc ngar bơceh lơh mờ kơ̆p kờñ brồ să tài Dà lơgar, tài Làng bol. Lơgar Việt Nam neh sền gròi geh cồng nha kòp gơtờp dờng CoVID-19, gờñ pờ mpồng brồ guh wơl lơh sa, geh mpồl bơtiàn ală lơgar dờp niam uă. Tàm bơta kal ke gùt plai ù, lơh sa lơgar Việt Nam kung gam gàr khà gơguh uă, gơwèt mpồl lam lài gùt dunia. Kờp dŭ GDP nam 2025 gơguh rơlao 8%; tàm tơngai bơh nam 2021 tus 2025 geh 6,3%. Bơta pràn gah lơh sa bơh 346 tơmàn Dolar Mỹ tàm nam 2020 gơguh tus 510 tơmàn Dolar Mỹ tàm nam 2025, gơguh 5 khà, ơm dơ̆ 32 tàm dunia; GDP tơl nă làng bol geh di pơgăp 5 rơbô Dolar Mỹ, gơguh 1,4 dơ̆ pơn drờm mờ nam 2020.