Mho òr (01/12), Thủ tướng Cíñ phủ ồng Phạm Minh Chính đơng lam Pơrjum Anih duh broă Đảng Cíñ phủ tơn jơh broă lơh rơcang, dră wơl sa kuề sa kuà, pơhì pơhà, broă ờ niam tơngai lơh broă Pơrjum dờng dơ̆ XIII. Ală jơnau cribơyai tàm Pơrjum đơs sùm bơta lơh sir adat boh lam ndrờm bal, geh cồng nha; ală broă lơh tìs sa kuề sa kuà, broă ờ niam kơn jơ̆ neh geh git gŏ, lùp khàu, lơh glài loh làng, kràñ cê. 

Đơs sồr lơh, Thủ tướng cih dờp cồng nha tơl làm mơya đơs là, kung gam sơl bơta ờ niam bè broă bàr pe nă kwang đơng lam, cau lam bồ ờ hềt ai tơnggŏ wil tơl kơnòl broă; broă lơh sền sơ wì is, git gŏ is tàm dơlam is kung gam ờ hềt niam. Thủ tướng sồr Anih duh broă Đảng Cíñ phủ pơn jat tai git nền rơcang, dră wơl sa kuề sa kuà là ală kơnòl broă tờm, gơ jat bal mờ bơt bơtàu, lơh niam wơl Đảng; lơh pràn tam gơl wơl sră pơ àr gơnoar atbồ, tơnguh bơta niam mpồl kwang bàng, cau lơh broă sa priă nhai dà lơgar geh bơta duh rơngòt jơnau pal jat, song dơpă, tơl pràn jak lơh jat jơnau sồr bơtàu tơnguh.