Bơyai lơh drà Kàl Hàm dơ̆ I nam 2025 geh bơyai lơh bal mờ broă lơh dờng ngan rlau jơh bơh lài tus tŭ do tàm lơgar Việt Nam, hòi tơrgùm 2 rbô 500 mpồl lơh sa kă bro, mpồl cau tàm lơgar mờ bơdìh lơgar. Mờ tơngume “Tàm tơrbŏ Kòn bơnus mờ Lơh sa, Kă bro”, broă lơh lòt rê kă bro phan, tăc blơi geh lơh duh hồl; gĭt nđờ rbô dơ̆ cribơyai kă rbo phan, sră pơrgon tăc blơi mờ sră cih kah lơh broă bal bơcri priă, tàm jàu măy mŏk đah ală mpồl lơh sa kă bro tàm lơgar mờ mpồl lơh sa kă bro lơgar Việt Nam mờ ală lơgar geh kĭ hơ, mờ priă kă bro phan mờr 5 rbô tơmàn đong. Bơyai lơh drà kung neh gơgơs dơ̆ lơh chờ bơh măy mŏk bơceh lơh dê mờ niam chài đơs crih tam ya, tiah đơs nền bơta kwơ tờm ngan: “Bơtàu tơngguh lơh sa pal gơlòt jăt bal mờ bơtàu tơngguh niam chài, mpồl bơtiàn mờ kòn bơnus”.

Đơs tàm Dơ̆ bơyai lơh tơn jơh, Thủ tướng ồng Phạm Minh Chính đơs nền Bơyai lơh drà do là dùl gah geh cồng nha gơhòi gơ jà jơnau kờñ ngui sa tàm dơlam lơgar – dùl bơta gơn kơnờm kwơmàng lơh pràn lơh gơlik phan mờ tăc, blơi phan mờ lơgar ndai – dùl gùng dà broă lơh niam ngan lơh pa ală “gơn kơnờm gơguh lơh sa ờs mờng bơh yau”- dùl nơm rơbàng tơrbŏ duh hồl tàm tơrbŏ lơh broă bal kă bro phan ală lơgar, lơh geh bơnàng jă bơtàu tơngguh ai drà kă bro tàm lơgar in tàm rài sồ. Thủ tướng kung ưn ngài ală nùs nhơm niam, bơta tam pà bal bơh jơh mpồl bơtiàn dê mờ làng bol tiah mìu càl rbŭt dà kŏ dà cò lơh aniai bơh broă lơh “Kàl Hàm gơn kơnờm”, bal mờ khà priă tă pơgồp rlau 316 tơmàn đong. Thủ tướng đơs nền nùs nhơm kờñ gơboh kòn bơnus do ngan là jơnau tơnggŏ niam ngan rlau jơh ai bơhiàn ờs mờng kwơmàng ngan “nùs nhơm jơi bơtiàn, nùs nhơm làng bol dùl lơgar bal” bơh jơi bơtiàn he dê, là bơnàng jă mờ là bơta pràn geh bơh tàm dơlam is nàng dà lơgar guh ngài mờ kơ̆ kơl jăp rlau tàm gùng lòt bơtàu tơngguh.