Anih cribơyai lơh sa gơ hòi gơ jà mờr 500 nă cau ala mat ală anih lơh broă Cíñ phủ mờ mpồl lơh sa kă bro 2 lơgar tus bal. Thủ tướng Algeria ưn ngài ală mpồl lơh sa kă bro, đơs nền 2 gah ndrờm gam tàm tơngai tam gơl lơh sa mờ kơp kờñ sơlơ tơnguh tai mut gơ rờm bal tiah do; mờ kung kơp kờñ ală phan bơna bơh Algeria dê bè sơnơm tơmba, phơng sih, phan bơna geh lơh bơh chi che rơp geh rề ơnàng bơta geh mat tàm Việt Nam.

Đơs tàm anih cribơyai, Thủ tướng ồng Phạm Minh Chính đơs sùm jơnau gơtha kah yau bơh broă geh lơh tơnơ̆ tŭ 2 lơgar tơnguh gơ gơs lơgar lơh broă bal jŏ jòng, đơs nền bơta pràn lơh broă bal dờng ơnàng tàm tơl broă, đơs là Việt Nam mờ Algeria kờñ pal pơn jat tai tam klac, bơtàu tơnguh tài jơnau kờñ hờm ram, gơboh gơbài làng bol dê.