Mang ngai 29/09, tàm hìu duh broă Cíñ phủ, di dơ̆ tơngkah kir sơnrai 50 nam lơh gĭt gơ̆p cribơyai broă mờ lơgar ndai đah bàr lơgar (1975- 2025), Thủ tướng Cíñ phủ ồng Phạm Minh Chính neh geh dơ̆ hòi điện thoại cribơyai mờ Thủ tướng lơgar Kộng hoà Ală ƀang Đức ồng Friedrich Merz tàm cribơyai ală broă lơh chồl tơngguh gĭt gơ̆p Tam klăc lơh broă bal jŏ jòng đah Việt Nam mờ Đức ngai sơlơ bơtàu tơngguh ngan ngồn, geh cồng nha mờ tơl làm.

Tàm dơ̆ hòi điện thoại cribơyai, Thủ tướng Cíñ phủ ồng Phạm Minh Chính sồr lơgar Đức pơn jăt tai pơgồp bal lam lơh jăt geh cồng nha Jơnau kĭ hơ Kă bro phan khăt gơboh đah Việt Nam mờ EU (EVFTA), gờñ sền swì ring bal Jơnau kĭ hơ Sền gàr dong kờl bơcri priă Việt Nam mờ EU (EVIPA), ai tơl bơta ƀươn rlau tai ai ală mpồl lơh sa kă bro bàr lơgar in rề ơnàng lơh broă bal bơcri priă mờ kă bro; ai jak chài măy mŏk mờ tam gơl pa bơceh lơh gơgơs broă lơh tờm pa tàm lơh broă bal 2 gah. Bàr đah dùl nùs ring bal gờñ tơnguh broă gĭt gơ̆p 2 gah gơguh tus khà jơnhoa rlau, pơn jăt tai sơlơ tàm pơgơl mpồl kwang bàng kâp dờng lòt còp bal mờ gơ̆p, lơh jăt geh cồng nha ală mpồl lơh broă bal gam geh tŭ do, hòi jà lơh ală jơnum lơh broă bal tàm ală broă: lơh sa, cíñ trị mờ lơh broă.