Thủ tướng ồng Phạm Minh Chính tơlik jơnau sồr sồ 176 nàng jal mhar bơsong jơnau gơlời wơl tài bơh mìu càl dờng sồ 10 bal mờ mìu dà kŏ dà cò. Tus ngai 29 nhai 09, mìu càl dờng neh lơh 11 nă cau gơtìp chơ̆t, 13 nă cau jòi ờ gŏ ƀồc, 8 nă cau ờ gơtùi hòi, 33 nă cau sồt să, uă hìu đam, hìu lơh sa gơtìp aniai uă.

Thủ tướng pơyoa jơnau tam pà bal moăt jrùng uă ngan tus mờ hìu nhă cau gơtìp chơ̆t mờ sồr Củ tịc Anih duh broă Làng bol ală càr, ƀòn dờng gơrềng bal tơrgùm tàm broă dong klàs cau gơtìp rềs àr, dong kờl hìu nhă geh cau gơtìp rềs àr, sơm ờ sa priă cau gơtìp sồt să, mhar lơh niam wơl phan bơna geh kwơ bè gùng lòt, ồs đèng, dà, viễn thông. Thủ tướng sồr Ƀộ Ling klàng, Kwang àng mờ ală mpồl geh sồr ai ling, kwang bàng pơgồp bal nàng dong klàs, gàr niam lơngăp lơngai. Ală ƀộ, gah lơh broă, ală tiah pal yal cồng nha rơcang kơrian tus Thủ tướng in lài mờ 15 jơ pah ngai nàng geh bơsong di tŭ ală bơta gơlik geh. Drim òr (29/09), tàm càr Nghệ An, Phó Thủ tướng Cíñ phủ ồng Trần Hồng Hà neh geh dơ̆ pơrjum pờ tơlik tàm internet mờ ală tiah nàng sồr lơh broă bơsong hoàc huơr bơh mìu càl dờng. Jăt jơnau yal, mìu càl dờng rơ̆p lơh geh mìu sơr ngan tus tàm tiah bơh càr Thanh Hoá tus càr Hà Tĩnh, tiah ring Đah tô, càr Phú Thọ. Tŭ do jơh ală dà dờng tàm 3 càr Thanh Hoá, Hà Tĩnh mờ Nghệ An ndrờm neh tih dà, geh khà yal lài 3 den tàng ală càr do pal tơrgùm rơcang kơrian mờ dà tih.