Mho òr (23/09), Thủ tướng Cíñ phủ ồng Phạm Minh Chính đơng lam dar pơrjum dơ̆ 14 bơh Mpồl sồr lơh dà lơgar dê bè ờ ai kup phan tàm dà lềng tìs adat boh lam (IUU). Tơnơ̆ mờr 8 nam lam lơh, uă broă lơh kuơmàng neh lơh geh cồng nha niam mơya Việt Nam kung gam ờ hềt geh Anih duh broă câu Âu (EC) tă sang jơnau tơngkah lài “Sră rơmĭt hơ̆ là Jơnau Lơh glài”. 

Jơnau tờm ngan là broă atbồ, gròi sền ơhò kup ka ờ hềt nền nòn, bơta lơh tìs broă kup ka tàm tiah dà lềng lơgar ndai kung gam gơlik geh, ngan là tàm 2, 3 càr tiah kềng gah dà lềng. Thủ tướng đơs sùm jơnau kờñ jal mhar là tơrgùm tă sang “Jơnau lơh glài”, sền gàr bơngă pin dờn dà lơgar mờ gàr sùm cồng nha kơ̆ kơljap. Ồng Phạm Minh Chính sồr ală Anih duh broă đơng lam Đảng ală kâp, ngan là cau lam bồ, sơlơ tơnguh tai atbồ, tam gơl pràn bơh kup ka ngài gah dà lềng gơ gơs ròng tam, lơh gơlik phan tàm dà rềp gah dà lềng nàng gàr niam broă lơh sa, gàr lơngăp lơngai cau kup ka in mờ pơgồp bơnah bơtàu tơnguh gah lơh phan tàm dà gơ jat bal mờ sền gàr gơnoar tờm dà lềng, bồt bơlàu, tơnguh bơngă lơgar Việt Nam dê tàm muh mat ală lơgar.