Bàr nă kwang đơng lam bồ đơs nền Việt Nam mờ Nam Phi là gơ̆p bơyô rềp mềr, lơgar lơh broă bal pin dờn, geh bơta ƀuơn bơta pràn bơtơl bal mờ gơ̆p tàm bơtàu tơnguh, ngan là ală gah tam gơl tơlir, tam gơl sồ, năng lượng lơh gơlik wơl mờ lơh sa mờ măi mok bơceh lơh.

Thủ tướng ồng Phạm Minh Chính đơs sùm, Việt Nam crăp rcang tă pơgồp jơh nùs ai lơh broă bal Nam- Nam, bal mờ Nam Phi sơlơ tơnguh tai lơh lài bal bè tơrmù rƀah, gàr tơl kòi phe, bơtàu tơnguh kơnhăp jŏ. Kwang atbồ lơgar Nam Phi kơ̆p kờñ sơlơ tơnguh tai tàm tơrbŏ mpồl lơh sa kă bro 2 lơgar tàm ngui phan kwơ tàm ù, lơh gơlik, broă lơh sa suơn sre mờ ôtô đèng. Bàr gah ring bal gờñ lơh sir sră nggal tàm dơlam is nàng tơnguh bơta gĭt gơ̆p tus “Tam klăc lơh broă bal kwơ màng” tàm nam 2025, wèt tus bơta gĭt gơ̆p lam lài đah ală lơgar gam bơtàu tơnguh.