Mpồl lơgar Việt Nam bơh Thủ tướng Cíñ phủ ồng Phạm Minh Chính lam bồ neh tus bal jơh nùs ngan, tă pơgồp geh cồng nha tàm mờr 20 broă lơh uă  lơgar tàm tơngume Pơrjum dê, tam pà uă gùng dà broă lơh kwơ màng bơ̆t mòn rài tơnơ̆ do mpồl ASEAN dê.

Bơta git gơ̆p lơh bơyô bal mờ lơh broă bal mùl màl đah lơgar Việt Nam mờ ală lơgar lơh broă bal kung geh lơh pràn mùl màl bơh rơlao 20 dơ̆ tìp đah bàr gah dê. Ală broă pơgồp bal, jơnau đơs bal mờ jơnau bơceh lơh bơh lơgar Việt Nam dê tơrgùm tàm broă lơh pràn broă bơ̆t bơtàu Mpồl bơtiàn ASEAN tam klăc bal, pràn is, tơrgùm bal mờ kơl jăp, ai làng bol lơh tờm, pơgồp bal broă bơtàu tơnguh dà lơgar mờ bơtàu tơnguh tiah do dê. Bơh tŭ hơ̆, lơgar Việt Nam pơn jăt tai ai tơngŏ gơnoar lơgar tàm mpồl rơcang lài, tus bal pràn mờ geh kơnòl, pơgồp bal mùl màl tàm broă tơnguh nùs nhơm tam klăc bal tàm dơlam mpồl, tơnguh uă gơnoar tờm bơh mpồl ASEAN dê, tài ring lơngai, kơl jăp, lơh broă bal mờ bơtàu tơnguh tàm tiah do dê.