Đơs tàm dơ̆ bơyai lơh, Thủ tướng đơs sùm Ràng tơlik neh lơh geh cồng nha sơrlèt rlau mờ bơta kơp gơn, ai tơnggŏ nùs nhơm tam klac dờng jơh gùt jơi bơtiàn – tơngu rơyas lơh gơs ală cồng nha crih crài bơh bồ tơngoh jak, nùs nhơm khin cha mờ bơta kơp kờñ brồ guh bơh jơi bơtiàn Việt Nam dê tàm rài pa. Mờ bơta ai gŏ wơl niam ngan cơng tàng kah yau, Ràng tơlik là pang rùp tơl làm bè cồng nha kac màng 80 nam do, gơ jat bal mờ broă lơh ai wơl lơngăp lơngai is jơi bơtiàn mờ bơt bơtàu củ nghĩa sàh hội. 

Do kung là cơng tàng ai gŏ jơnau song lơngăp lơngai is jơi bơtiàn gơ jat bal mờ củ nghĩa sàh hội, mờ kung tơnguh bơta kuơ bồ tơngoh jak Việt Nam. Thủ tướng đơs nền, Ràng tơlik “80 nam – Gùng lòt lơngăp lơngai is, khat gơboh, gơboh gơbài” jờng rơ nùs nhơm, bồ tơngoh, bơta bơceh lơh bơh kòn bơnus Việt Nam dê, lơh gơs nùs nhơm kờñ gơboh dà lơgar mờ bơta pin dờn jơh nùs bơh Làng bol dê gơ wèt mờ Đảng, Dà lơgar mờ broă lơh tam gơl pa.