Tàm broă lơh bơh Anih cri bơyai Lơh sa làng bol lơh is Việt Nam nam 2025, mho òr (16/09), tàm Hà Nội geh bơyai lơh Dar tìp măt boh bơr kâp dờng. Dar tìp măt boh bơr geh broă tus bal bơh mờr 1 rơbô nă cau ala măt là đơng lam Cíñ phủ, ală ƀộ, gah lơh broă, ală càr ƀòn dờng, ală mpồl lơh broă bơh ală lơgar, ală cau gĭt wă jrô, ală cau jăk mờ mpồl ală cau kă bro làng bol lơh is jơh gùt lơgar.

Đơs tàm Dar tìp măt boh bơr kấp dờng, Thủ tướng Cíñ phủ ồng Phạm Minh Chính kơ̆p kờñ ală mpồl lơh sa kă bro, cau kă bro lơh jăt nền nòn gùng dà broă lơh bơh Đảng, adăt boh lam bơh Dà lơgar dê, ai tơngŏ nùs nhơm kă bro mờ kơnòl mpồl bơtiàn; lơh broă bal mờ Đảng, Dà lơgar bal mờ làng bol kơ̆ dơn gùng dà lơngăp lơngai is jơi bơtiàn, Củ nghĩa Sàh Hội. Bè kơnòl broă mùl màl, Thủ tướng sồr lơh geh cồng nha ală jơnau lơh nền tàm pơrjum bơh Pơrjum dờng dơ̆ 13 dê, ală jơnau lơh nền tàm pơrjum bơh Ƀộ Cíñ trị dê pa ai lơh jăt, tàm hơ̆ sền kwơ broă ngui măi mok, tam gơl pa bơceh lơh nàng lơh kơ̆ kơl jăp, bơtàu tơnguh ală gơn kơnờm gơguh lơh sa pa.