Tàm nùs nhơm chờ hờp gùt lơgar dê di tơnkah 80 nam Kăc màng nhai Phàm mờ Sơn tờm Dà lơgar ngai 02 nhai 9, drim òr (25/08), Ƀộ Adăt boh lam bơyai lơh Dơ̆ tơnkah 80 nam Ngai bơhiàn ờs mờng gah Adăt boh lam lơgar Việt Nam ngai (28/8) mờ Pơrjum dờng pơrlòng kờñ gơboh dà lơgar gah Adăt boh lam dơ̆ 6.

Dờp ală cồng nha neh lơh geh bơh gah Adăt boh lam dê tàm 80 nam do, tàm pơrjum, Thủ tướng Cíñ phủ ồng Phạm Minh Chính ala măt kwang đơng lam bồ Đảng, Dà lơgar jào Huân cương Lơh broă khà Dùl ai Ƀộ Adăt boh lam in tài cồng nha jăk chài tàm gah adăt boh lam, pơgồp bal tàm broă bơ̆t bơtàu mờ sền gàr Dà lơgar Việt Nam Sàh hội Củ nghĩa, tài jơnau kờñ làng bol pas, dà lơgar pràn, lơh tờm, ndrờm bal, gơguh jăk. Tàm tơngai tus, Thủ tướng Cíñ phủ ồng Phạm Minh Chính sồr gah Adăt boh lam tơrgùm bơsong ală kal ke, gơkòl bè gùng dà broă lơh, adăt boh lam, ai geh bơta pràn hòi jà mờ ngui geh cồng nha ală bơta pràn, ai geh bơta pràn, bơnàng jă nàng dà lơgar pràn kơl dang mŭt tàm rài pa. Thủ tướng pin dờn mờ bơhiàn 80 nam gah Adăt boh lam dê, broă adăt boh lam tàm tơngai tus pơn jăt tai geh broă bơtàu tơnguh pa, pơgồp bal tàm broă lơh geh cồng nha broă kăc màng bơh Đảng, bơh jơi bơtiàn dê.