Đơs tàm dar pơrjum, Thủ tướng ồng Phạm Minh Chính sồr tơrgùm lam lơh dơ̆ tàm pơrlòng lơh uă nàng lơh sir kơnòl broă geh ai. Mờ gùng dà broă lơh “Sơlơ tơnguh tai, jơh nùs, lơh ngan, geh cồng nha, ờ ơm ngài mờ làng bol, tơryang tơryồng bơceh lơh, geh cồng nha gơguh uă”, Thủ tướng đơs là broă lơh đơng lam pal khin cha, kơrhia, bơceh lơh, ngăc ngar, di tŭ, geh cồng nha.

Tàm ală kơnòl broă tờm, Thủ tướng sồr rcang niam ngan, nền npòn ală tơngume drơng Pơrjum Dà lơgar dơ̆ 13 mờ Pơrjum dơ̆ 10, Quôk hội khoă 15. Lơh lài bè ờs lơh sa dờng, gròi sền roh giă priă, gàr niam ală bơta tàm pơnring dờng bơh rài lơh sa mờ sơlơ tơnguh tai gơguh lơh sa. Thủ tướng sồr jat sền bơta gơlik geh ală bơta, gàr niam bè ờs drà kă bro, giă phan, ngan là ală bơta phan, drơng broă bơh Dà lơgar dê atbồ. Gơ hòi gơ jà ngui sa tàm lơgar, bơtàu tơnguh pràn drà kă bro tàm lơgar. Lam lơh kràñ cê jơh nùs, di tŭ, geh cồng nha ală Jơnau lơh nền tàm pơrjum bơh Ƀộ Cíñ trị dê. Lam lơh, lơh broă geh cồng nha broă lơh gơnoar atbồ ƀòn lơgar 2 kấp.