Mang ngai 10/9, Thủ tướng Cíñ phủ ồng Phạm Minh Chính, Kwang lam bồ Mpồl sồr lơh dà lơgar ală broă lơh, rơndap broă kuơmàng dà lơgar, broă lơh tờm gah gùng lòt pơndiang phan đơng lam dar pơrjum dơ̆ 20. Dar pơrjum geh bơyai lơh pờ tơlik tơn tàm internet mờ 27 càr, ƀòn dờng. Tus tŭ do, gùt lơgar neh geh 2 rbô 476 kơi sồ gùng ù gờl rơndeh lòt mhar. Ƀộ Bơt bơtàu mờ ală càr, ƀòn dờng gam lơh ngan lam lơh 733 kơi sồ gam wơl gơ wèt 22 rơndap broă lơh. Tàm dar pơrjum, ala mat ală càr, ƀòn dờng, cau tờm lơh rơndap broă neh đơs broă rơndap tap sèng gơnoar atbồ 2 kâp geh gơ rềng tus tơngai ai ù lơh rơndap broă, ai priă bơcri ală rơndap broă lơh; ai tơnggŏ bơta lơh ngan tơnguh mhar tơngai lam lơh… Mờ kung pà git, bàr pe rơndap broă lơh geh khà broă gam wơl uă ngan tàm tŭ gam tàm kàl mìu, lơh gơ rềng tus broă lam lơh.

Đơs tàm dar pơrjum, Thủ tướng ồng Phạm Minh Chính đơs sùm jơnau kờñ lơh ngan gơguh lơh sa uă mơya pal kơ̆ kơljap sùm, tàm hơ̆, ai priă bơcri dà lơgar là dùl bơta gơn kơnờm chồl tơnguh gơguh lơh sa. Ală ƀộ, gah broă lơh, ală tiah mờ nùs nhơm “jal mhar, khin cha” rlau tai, tơnguh mhar broă lam lơh ală rơndap broă lơh kuơmàng. Thủ tướng sồr lam lơh jat nền nòn jơnau lơh nền tam pà kâp, tam pà gơnoar “ƀòn lơgar lơh nền, ƀòn lơgar lơh, ƀòn lơgar kong kơnòl”. Thủ tướng sồr pal lơh ngan lam lơh ală kơnòl broă nàng lơh gơs di tŭ tơngai hơ pơrgon ală rơndap broă lơh, mờ jơnau kờñ 3 rbô kơi sồ gùng ù gờl rơndeh lòt mhar mờ 1 rbô 700 kơi sồ gùng ù gờl kềng gah dà lềng; gàr lơh gơs rơndap broă lơh ƀlàng rơndeh par ală lơgar Long Thành tàm nam 2025”. Thủ tướng kung tơngkah, ală cau tờm bơcri priă pal gàr bơta niam broă lơh, gàr kloh niam tiah ơm kis, lơngăp lơngai lơh broă jat di jơnau sồr.