Mho ngai 01/10, Thủ tướng Cíñ phủ ồng Phạm Minh Chính đơng lam dar pơrjum Cíñ phủ nàng sền swì broă lơh jăt, pơn jăt tai kờp sền nền wơl, bơyai ală broă lơh tă bơsong kal ke, gơ wă gơkòl tàm broă lơh broă broă lơh gơnoar ătbồ ƀòn lơgar 2 kâp. Đơs pơndŭt dar pơrjum, Thủ tướng ồng Phạm Minh Chính đơs sùm nùs nhơm là pơn jăt tai lơh broă kràñ cê jơh nùs, ndrờm bal mờ cồng nha rlau; gờñ bơsong ală bơta ờ hềt dipal tŭ do; gơnoar ătbồ ƀòn lơgar 2 kâp pal geh lơh broă ndrờm bal, ring bal, gơlòt niam, tơl làm, lơh geh jơnau kơ̆p gơn sùm bơh Đảng, Dà lơgar mờ Làng bol dê.

Thủ tướng đơs là, rơndăp lơh mpồl lơh broă pa pal niam rlau mờ mpồl lơh broă yau; broă lơh sră nggal sră pơ àr gơnoar ătbồ ai làng bol, mpồl lơh sa kă bro in pal ngai sơlơ niam rlau, ngan là tàm ală broă: ù tiah, rơndăp ù tiah, priă jền, jơtài, bơ̆t bơtàu, gùng lòt, lơh sơnơm, bơto bơtê…; lơh sir gơs anih jơnau yal tơnggĭt mờ tàm tơrbŏ, tơrbŏ bal mờ ală jơnau yal tơnggit bơsong sră nggal sră pơ àr gơnoar ătbồ bơh ală ƀộ, gah mờ ƀòn lơgar dê. Tàm dar pơrjum, Thủ tướng ai gĭt loh, tŭ do gam 31 rbô nă cau rlô broă ờ hềt geh tă tơm priă dong kờl; sồr lơh loh jơnau bơh tài, tơngkah mpồl lơh broă lơi geh priă, geh jơnau lơh nền rao mờ ờ tă tơm priă. Thủ tướng sồr lơh jơh broă tă tơm priă dong kờl ai kwang bàng rlô broă in lài mờ ngai 10/10/2025.