Dơ̆ trồ tiah lơh aniai pa gơlik geh hoàc huơr dờng ngan bè cau mờ phan bơna, uă gơl gùng lòt rê, broă bơt bơtàu gơtìp tơrlah, ờ diơng kơn jơ̆, gơrềng kơn jơ̆ tus rài kis mờ lơh sa. Tơrgùm kờp bơh sơn rờp pà gŏ, 42 nă cau chơ̆t mờ roh thĭt, 6 nă cau sồt să.

Thủ tướng sồr ală tiah bơh Nghệ An tus Quảng Ngãi bal mờ ală Ƀộ geh gơrềng lam lơh mhar broă lơh dong kờl, sền gròi dong kờl cau gơtìp sồt să, dong kờl phan sa, dà hùc, sơnơm tơm ba mờ tiah ơm ing. Mơkung, mhar ngan lơh niam wơl phan bơna bơt bơtàu kwơ màng, tơrgùm kờp hoàc huơr mờ yal lài mờ ngai 3 nhai 11, bơt bơtàu ală jơnau neh lơh nền tơrgùm bal yal mờ Cíñ phủ in lài mờ ngai 8 nhai 11. Cíñ phủ neh dong kờl 100 tơmàn đong bơh kes priă rcang gàr lài Dà lơgar nam 2025 ai ƀòn dờng Huế in nàng kờñ bơsong hoàc huơr, gàr niam lơngăp lơngai mờ bè ờs rài kis làng bol in.