Thủ tướng sồr ală tiah mhar ngan bơsong wơl phan bơna bơt bơtàu gùng che ồs đèng, dà sàng goh, gùng lòt rê, viễn thông. Pơn jat tai kờp sền, hòi jà tơrgùm bal tơl rơndeh rơndồ măi mok dong kờl ai ală hìu bơnhă gơtìp ờ tơl jơgloh in, ntrờn làng bol tus tiah ơm lơngăp lơngai; gàr niam broă pà phe pal geh lam lơh mơ tàm ngai 14/11 do; mơkung pơn jat tai hòi jà ală mpồl lơh sa kă bro, cau geh nùs nhơm niam mờ “nùs nhơm jơi bơtiàn, bơta nđàc làng bol” dong kờl làng bol sơr lèt gan kal ke.

Lài hơ̆, tàm dơ̆ lòt lơh broă tàm càr Gia Lai, klo ngai, ngai 13/11, Thủ tướng ồng Phạm Minh Chính neh tus còp, lơh broă mờ Mpồl ling sền gàr tiah nhàr lơgar càr Gia Lai, đơng lam dơ̆ pơrjum mờ ală Ƀộ, gah broă, đơng lam tờm càr Gia Lai dê bè broă lơh bơsong jơnau gơ lời wơl tài bơh mìu càl rơbŭt dờng. Thủ tướng sồr lời mơ khà priă 60 tơmàn đong nàng lơh tiah ơm kis pa tàm bơta jal mhar, gàr niam ai làng bol in geh tiah ơm pa. Đơs sùm broă jal mhar kờñ pal bơtàu tơnguh wơl lơh sa, kă bro, Thủ tướng sồr ală mpồl kràñ cê jơh nùs mut lơh broă dong kờl pơs wàs, lơh niam wơl nàng geh tiah ai broă lơh sa in. Ală anih priă jền pal tơn jŏ, lời ing dồs, ală bơnah ai priă ai càn nàng mpồl lơh sa kă bro in bơsong jơnau gơ lời wơl tơnơ̆ mìu càl rơbŭt dờng; Kờp wơl bơnah priă dia, priă jền, priă tă lơh; mhar lơh niam wơl jơh ală hìu bơsram mờ hìu sơnơm. Càr Gia Lai neh kờp dŭ kờp jơh hoàc huơr pơgăp 5 rơbô 900 tơmàn đong, Thủ tướng sồr Ƀộ priă jền pal tàm pơnring bơta bal nàng geh bơta dong kờl di pal mờ di tŭ.