Sàh Yang Mao, càr Dăk Lăk là dùl tàm ală sàh kong gơ rềng kơn jơ̆ ngan kơn jut ngan bơh ngơr bam dê. Jat tơrgùm kờp bơh sơn rờp, tơnơ̆ mìu dờng dơ̆ do, jơh gùt sàh Yang Mao geh mờr 80 nơm hìu gơtìp ngơr bam jrô ngan, tàm hơ̆ geh 2 nơm hìu gơtìp tơrlơm jơh tơn mờ 5 nơm hìu gơtìp dà cò pơrdô. Uă gơl gùng tàm thôn gơtìp tơrlah, koh gơl gùng lòt, dà wềl tam cah is bàr pe tiah.

Bàr rbàng ing tàm gùng đah mat tơngai lik Trường Sơn gơtìp aniai, Gùng càr 12 gơtìp koh gơl lơh gơbàn kal ke tàm broă tus mờ dong kờl. Anih duh broă làng bol sàh neh sồr jơh mpồl lơh broă tàm ƀòn lơgar, geh kwang àng sàh, ling grăp ƀòn mờ ală mpồl cau tơrgùm dong kờl làng bol dap phan tàm hìu đam, ntrờn tus tiah niam ờdo ờdă. Mờ kung pơgồp bal mờ mpồl lam lơh mhar lơh niam wơl, ai lòt rê tàm ală anih gơtìp tơrlah nàng jun pơndiang phan dong kờl mờ phan ngui sa pal geh.

Ală ngai do, mìu dờng jŏ jòng lơh dà tih bơh bồ tô gơ hòr tus mhar, lơh uă kơnhoàl ù tiah tàm sàk Krông Bông, càr Dăk Lăk gơtìp ngơr jrô, koh gơl. Tàm hơ̆, thôn 27 là dùl tàm ală kong gơrềng kơn jơ̆ ngan. Jăt Anih duh broă Làng bol sàh Krông Bông, tus mho ngai 17/11, puan thôn: 27, 28, 29 mờ 30 bal mờ rlau 500 hìu làng bol neh gơtìp wềl jơh. Bal mờ hơ̆, uă anih sơbơng roh geh tơlar ù.

Gơnoar ătbồ ƀòn lơgar neh pơrjum mhar Mpồl rơcăng gàr làng bol làng bol, lam mpồl drơng gak sùm mang ngai, dăng che yal tơngkah, sơntơ̆p jrong tàm ală anih ngơr bam jrô mơkung lam ntrờn làng bol tus anih ơm lơngăp lơngai. Rlau 100 nă kwang bàng, kwang àng, ling klàng làng bol ntrờn làm bă tiah bal mờ mpồl dồ bă tiah geh hòi tơrgùm gùt mang àng; sàh kung ngui ka nô mờ ơhò mpồl lơh sa kă bro dê nàng dong kờl cau.

Mìu dờng jŏ jòng, uă tiah tàm càr Khánh Hòa gơtìp ngơr bam jrô, gùng lòt gơtìp koh gơl. Tàm kuèl Khánh Lê (gùng dà lơgar 27C), tơrlah dờng ngan lơh uă cau chơt jê. Mìu dờng sùm lơh taluy hơđang tàm gùng dà lơgar 27C gơtìp tơrlah, uă pơnai lŭ dờng gơ dùh tàm gùng. Drim ngai 16/11, dơ̆ tơrlah dờng ngan lơh ală mpồl dong kờl rềs àr gơtìp tam cah is.

Tus 11 jơ ngai, jơh 15 nă kwang bàng, cau dong kờl rềs àr neh geh lam lik bơh tiah sơbơng roh. Anih lơh broă geh gơnoar neh ai git nđờ jơt nơm măi mok, phan bơna nàng cò tơring, chŏ jơh ù lŭ nàng mut tàm tiah gơtìp tơrlah. Tàm Bắc Nha Trang, ală gơl gùng ngai 23 nhai 10, Nguyễn Khuyến, ngai 2 nhai 4… gơtìp ngơr bam jrô, tiah kềng gah dà dờng Cái, dà gơguh tih rềp bơnàng gùng tơn. Tàm Cam Ranh mờ Cam Lâm, uă ƀòn làng bol ơm kis gơtìp dà wềl, geh hìu bơnhă pal guh hơđang rơkàng hìu nàng kơp cau tus dong kờl. Mpồl lơh broă geh gơnoar neh lơh anih tơngkah lài, ntrờn làng bol lik bơh ală tiah thòng, tiah kuơmàng.