Bal mờ gùng dà broă lơh ntrờn làng bol, sơnah ƀòn Sông Cầu neh rơcang geh anih ơm tơrgùm bal, rơcang phan sa, dà hùc, mpồl dong kờl lơh sơnơm; mờ ai mpồl lơh broă sền gàr ngai kung bè mang tàm tiah ơn ơhò plung mờ tiah ƀòn ơm kis. Lă gŭ ròng ka tàm dà lềng geh sồr ờ geh cau ơm. Geh măt tàm Mpồl ƀòn Từ Nham, ồng Đỗ Hữu Huy, Phó Ƀí thư Tỉñ ủy càr Dăk Lăk lòt sền ală tiah dà gơguh tih, còp làng bol tàm tiah pleh mờ sồr lơh ngan ntrờn jơh ală hìu gam tai. Càr Dăk Lăk neh hòi jà làng bol bañ rê wơl tàm hìu tŭ mìu càl dờng ờ hềt jơh; lơh jăt jơnau kơrian ờ ai lik tàm dà lềng mờ bơto sồr mpồl lơh broă geh gơnoar, gàr niam màng kis tàm ală ngai mang tŭ mìu càl dờng gam.

Kờp tus ngai òr (06/11), gùt càr Gia Lai neh lơh gơs broă ntrờn rlau 100 rbô hìu bơnhă làng bol, tus ală anih ơm pleh niam ờdo ờdă. Git nđờ rhiăng hìu bơsram, hìu niam chài mờ hìu lơh broă bơh anih lơh broă dê geh ngui nàng lơh anih ơm pleh càl rbut dờng. Ală anih prap rơcang gàr phan ngui sa pal geh, xăng zờu, sơnơm tơmba geh rề ơnàng tac bro; mpồl ồs đèng, viễn thông, lơh sơnơm ndrờm ai cau lơh broă ngai mang nàng gàr niam yal tơnggit jơnau, sền gàr pràn kơldang să jan mờ jơnau kờñ pal geh ai làng bol in. Tềng đap bơta gơlik geh kal ke bơh càl rbut dờng dê, ồng Phạm Anh Tuấn – Củ tịc Anih duh broă Làng bol càr Gia Lai, Cau lam bồ Mpồl đơng lam tiah tờm gơbàn neh sồr sơn đờm lam lơh broă rơndap lơh drơng wơl khà 5 tàm 58 sàh, sơnah ƀòn tiah Gia Lai Đông (càr Bình Định yau).

Jơnau sồr lơh ờ tam gơl bơh càr dê là gàr niam ờdo ờdă màng kis ai làng bol in là lài ngan rlau jơh, dờng màng ngan rlau jơh; ờ gŏ di lời làng bol ơm wơl tàm tiah sơbơng roh. Tơl bơta hoàc huơr gơlik geh tài bơh sền ờ sơp, cau lam bồ ƀòn lơgar pal kong kơnòl tơn.

Nam do, làng bol tiah dà lềng Khánh Hoà rơcăng ngan. Rlau 42 rbô nơm hìu gŭ rơ kị bal mờ gĭt nđờ rbô nă cau lơh broă tàm pòt dà lềng Vân Phong mờ tiah dà lềng Nha Trang neh geh sồr ntrờn guh hờ àr. Uă hìu kơ̆t kơnhăp hìu gŭ rơ kị mờ che sreng dờng, lơh kơ̆ wơl hìu kŭ drơng sền, mờ geh tŭ là lơh gơkram ing dùl bơnah rơ kị tàm tiah dà jrô nàng tơrmù ƀà gơ aniai bơh nsừc dờng dà lềng dê. Tàm 6 anih ơhò ka ơm mờ tiah kơ̆t ơn ơhò plung jăt gah dà lềng, pơgăp 5 rbô nơm ơhò ka neh tus anih ơhò ơm niam lơngăp lơngai.

Tàm ù tiah gùt càr, 9 jơnum lơh broă kâp càr geh Anih duh broă Làng bol càr Khánh Hoà lơh, să tờm tơn tus ƀòn lơgar gơtìp pơhìn uă nàng sồr lơh, lòt sền mờ pơlam drơng wơl. Ală mpồl lơh broă geh gơnoar geh jàu gròi sền kràñ niam lơngăp lơngai tơnau dơng dà, ală gùng che đèng mờ gùng điện thoại, rơcăng lài rơcăng phan ngui, măy mŏk, cau lơh broă drơng mìu dờng, dà cò mờ tơrlah ù, gàr niam lơngăp lơngai ngan rlau jơh ai làng bol in.