Bal mờ ală gùng dà broă lơh rơcang pleh mờ mìu càl dờng ai ală broă lơh gùng, bơtơ̆t rơbòng dà ală tiah Đah jum tàm Gùl lơgar mờ Tây Nguyên gam rơcang “poan tàm tiah hơ̆ tơn” tŭ lơi kung rơcang lài ntrờn làng bol gờñ, bañ lời ờ thàn, ni sơna. Jăt gùng dà broă lơh rơcang pleh mờ mìu càl dờng sồ 13, ală càr tàm tiah Đah jum tàm gùl lơgar mờ Tây Nguyên neh rơcang hòi jà ơhò plung tàm dà lềng tus tàm anih pleh ơm; yuh dà mờ khà git nđờ tơlăk khối tàm ală tơnao, bơtơ̆t dơng dà, hìu măi pờ tơlik ồs đèng dà. Geh ờ uă càr neh lơh jăt gùng dà broă ntrờn làng bol mờ jơnau kờñ pal ntrờn jơh lài mờ 5 jơ mho ngai 06 nhai 11.

Tềng đap broă gơlik geh kal ke bơh càl rbut dờng Kalmaegi dê, Anih duh broă làng bol càr Lâm Đồng geh sră nggal sồr lơh jal mhar, sồr ală sờh, gah broă lơh, ală sàh, sơnah ƀòn mờ mpồl lơh broă geh gơ rềng crăp rơcang lam lơh broă lơh rơcang, kơryan mờ drơng wơl mờ càl rbut dờng, mìu dà tih tơnơ̆ càl rbut dờng. Củ tịc Anih duh broă làng bol càr Lâm Đồng sồr ală sàh, sơnah ƀòn, tiah is ồn Phú Quý jat sền nền nòn broă gơlik geh bơh trồ tiah dê, yal di tŭ tus làng bol in, ờ lời gơlik geh bơta sền ờ sơp. Mờ kung lòt sền, kờp sền ală tiah làng bol ơm kis kềng gah dà dờng, dà croh, tiah thòng, tiah geh jơnau pơhìn gơtìp tơrlah, crăp rơcang broă rơndap lơh ntrờn làng bol tus tiah lơngăp lơngai.

Nàng rơcang pleh mờ mìu càl dờng sồ 13 (Kalmaegi) gam mờr tus tàm ù gờl mờ bơta kal ke, kwang bàng, cau ling Mpồl ling sền gàr tiah nhàr lơgar càr Gia Lai neh pơgồp bal mờ gơnoar atbồ đong kờl làng bol sơndră hìu đam, ntrờn phan tus tàm anih lơngăp lơngai; mờ geh sùm broă sền gàr ngai kung bè mang nàng di tŭ rơcang pleh mờ ală bơta gơlik geh. Tŭ do jơh ală mpồl ling sền gàr tiah nhàr lơgar càr Gia Lai geh 18 mpồl mờ 280 nă kwang bàng, cau ling bal mờ 19 nơm rơndeh ôtô, 185 nơm rơndeh Honda, 20 nơm ơhò mờ canô bal mờ tơl phan dong kờl cau gơtìp rềs àr.

Đại tá Trần Tiến Hải, Phó Kwang đơng lam bồ Mpồl đơng lam Ling klàng, mờ kung là kwang lam bồ Mpồl ling sền gàr tiah nhàr lơgar càr Gia Lai pà git: ală pôs ling, anih sền gàr nhàr lơgar neh tơnguh kwang bàng tus tàm ală tiah di gơlan gơtìp uă, tus mblàng yal, lam sồr làng bol tơnguh jơnau rơcang lài, bañ ờ sền gròi tềng đăp mờ mìu càl dờng. Ală mpồl lơh broă kung rơcang tơnguh mpồl ling, hìu prăp phan, rơcang lài anih ơm pleh ai làng bol in tŭ kờñ. Phan sa, phan ngui, sơnơm neh geh prăp lài tơl.