Kờp jơh khà priă bơcri 07 nơm hìu bơsram là 1 rơbô 516 tơmàn đong, lơh pa ndrờm bal 212 jơdŭ bơsram mờ ală mpồl lơh broă geh gơnoar bal mờ phan bơna bơta chài. Ală broă lơh rơ̆p ai geh bơta tờm bơsram sră kơl jăp ai rơlao 7 rơbô nă kơnòm bơsram tàm tiah nhàr lơgar càr Gia Lai in, tàm hơ̆ uă ngan là kơnòm bơsram jơi bơtiàn ờ gal cau.

Đơs tàm dơ̆ sơn đờm mŭt lơh, Phó Thủ tướng ồng Hồ Quốc Dũng đơs nền: rơndăp broă lơh do geh nùs nhơm kwơ màng gơwèt mờ tiah nhàr lơgar, dong kờl bơtàu tơnguh cau lơh broă, tơnguh mpồl tam klăc bal mờ gàr kơl jăp lơngăp lơngai dà lơgar. Phó Thủ tướng ồng Hồ Quốc Dũng sồr càr Gia Lai rơcang nền nòn, atbồ mờ bơyai lơh kơl niam, kơl jăp, di tơngai geh ai. Mờ dan Ƀộ Bơto bơtê mờ Bơsram gờñ lơh gơs ală gùng dà broă lơh, nàng dong kờl kơnòm bơsram jơi bơtiàn ờ gal cau, tàm hơ̆ uă ngan là ală broă dong kờl gơrềng tus mờ sào sa, ơm bic, lòt rê, bơsram sră.

Kung tàm ngai òr (16/11), Anih duh broă Làng bol càr Quảng Ngãi bơyai lơh Dơ̆ sơnđờm mut lơh bơt bơtàu 4 Hìu bơsram pe kấp ơm sa bĭc tơn tàm hìu bơsram tàm ală sàh tiah nhàr lơgar Dục Nông, Sa Loong, Rờ Kơi mờ Mô Rai.

Đơs tàm dơ̆ sơnđờm mut lơh, Phó Thủ tướng ồng Nguyễn Hòa Bình đơs sùm, ală broă lơh bơt bơtàu ờ mìng là tiah bơsram sră, bơsram tàp bơh kơnòm bơsram dê lơm mờ gam là pơrya bơh bơh bơta pin dờn, nùs nhơm brồ guh mờ bơta tam klăc bal đah tiah kơh bơnơm mờ tiah ring, đah làng bol jơh gùt lơgar mờ làng bol tiah nhàr lơgar. Broă sơnđờm mut lơh ală hìu bơsram pe kấp tàm tiah nhàr lơgar càr Quảng Ngãi là broă lơh geh gơtha jrô ơnàng ngan, tơngŏ kơnòl bơh Đảng, Dà lơgar dê gơwèt mờ broă lơh bơto bơtê mờ làng bol tiah sar lơgar ngài, tiah nhàr lơgar dê.