Càr Gia Lai neh ai lơh broă wơl jơh ală broă rơndăp lơh drơng mìu càl rbŭt dờng sồ 13 (Kalmaegi) tàm kâp 5, kâp jơnhoa ngan rlau jơh tàm drơng wơl trồ tiah lơh aniai, gơ wèt 16 sàh rềp kềng dà lềng, mờ kâp 4 gơ wèt mờ 42 sàh gam wơl gơ wèt kơnhoàl ù tiah đah măt tơngai Lik càr dê. Pơgăp 12 jiơ klo ngai do 06/11, càr rơ̆p lơh sir jơh broă ntrờn mờr 100 rbô hìu làng bol, ndrờm mờ pơgăp 350 rbô nă cau tàm ală tiah tờm pơhìn uă mờ rềp kềng dà lềng, nàng kờñ gàr niam ờdo ờdă ngan lài mờ tŭ mìu càl rbŭt dờng tus tàm ù gờl. Mpồl đơng lam tiah tờm gơbàn càr Gia Lai geh lơh tàm sơnah ƀòn An Nhơn bơh ồng Phạm Anh Tuấn, Củ tịc Anih duh broă Làng bol càr, Lam bồ Mpồl đơng lam Rơcăng gàr lài broă làng bol càr lơh Đơng lam mpồl. Ală kwang bàng Mpồl Lơh kơnòl broă sùm Tỉñ ủy càr geh jàu să tờm tơn drơng kơnòl, jăt sền mờ sồr lơh broă lơh rơcăng, drơng mìu càl rbŭt dờng tàm tơl kơnhoàl ù tiah bè Quy Nhơn, Hoài Ân, Tây Sơn, Hoài Nhơn, Vĩnh Thạnh, Phù Mỹ mờ ală sàh đah măt tơngai mŭt càr Gia Lai, gàr niam jơh ală mpồl cau geh hòi tơrgùm uă ngan rlau jơh jăt jơnau đơs “puan dùl bă tiah tơn”, crăp rơcăng drơng wơl mờ tơl jơnau digơlan gơlik geh jal mhar tŭ mìu càl rbŭt dờng sồ 13 mờr tus rềp ù gờl.

Jơh gùt càr Dăk Lăk geh 2 rbô 555 nơm ơhò lơh ka bal mờ 10 rbô 994 nă cau lơh broă tŭ do neh mut tàm anih ơm pleh lơngap lơngai, is ồn tiah sơnah ƀòn Xuân Đài atbồ 363 nơm ơhò lơh ka, tus 4 jơ mho ngai 05/11 ală ơhò do neh mut hờ gah jơh. Broă lơh sền gàr ală bă tiah ròng phan tàm dà lềng dờng ngan kung geh lơh jal mhar sơl bal mờ 536 hìu gŭ, 23 rbô 329 gŭ ròng ka ti dờng mờ 252 nơm hìu gŭ ròng hàu, mpồl lơh broă tàm ƀòn lơgar sồr lơh gơs broă kơt kơ̆ wơl lài mờ 10 jơ drim ngai 06/11. Bal mờ hơ̆, broă lơh gàr tơl phan sa mờ phan bơna dong kờl rềs àr geh lam lơh jal mhar. Sờh lơh sa mờ măi mok mờ kă bro phan hờ lơgar ndai neh lơh gơs broă prap rơcang phan bơna, phan ngui sa pal geh mờ rlau 400 tấn phe, rlau 10 rbô 350 thùng dà, 72 rbô thùng ƀung mi mờ rlau 1 rbô pang tìm cang, mờ kung sồr mpồl cau bơsram dờng, rơndeh rơndồ jun pơndiang nàng dong kờl tŭ geh jơnau sồr. Sồr lơh tàm Mpồl đơng lam tiah tờm gơbàn, Củ tịc anih duh broă làng bol càr ồng Tạ Anh Tuấn sồr ală tiah rơcang lài ală broă rơndap lơh drơng wơl mờ broă gơlik geh ờ niam ngan rlau jơh, sền gàr lơngăp lơngai wil tơl làng bol in.

Tŭ do, jơh gùt càr Khánh Hoà geh mờr 7 rbô nơm ơhò ka, tàm hơ̆ pơgăp 900 nơm bal mờ rlau 5 rbô 700 nă cau gam lơh broă tàm dà lềng, neh geh yal mờ hòi rê tus tiah ơm pleh niam lơngăp lơngai. Jơh ală rlau 3 rbô 500 nơm rơkị ròng bal mờ rlau 100 rbô nơm gŭ ròng phan tàm dà kung neh ơm lơh broă sơl, cau lơh broă ntrờn lòt tus hờ àr. Ală tơnau dơng dà ngui sa mờ hìu măy đèng dà geh jăt sền kràñ ngan, yuh dà kơryan nàng coă dà tih, gàr niam ờdo ờdă ai tiah đah đơm in. Jăt jơnau yal lài bơh anih lơh broă nhơm trồ tiah dê, bơh ngai 6 tus 8/11, Khánh Hoà digơlan geh mìu dờng tus dờng ngan, càl pràn kâp 10 tus 12, nsừc dà lềng gơra jơnhoa bơh 3 tus 5 thơk. Mờ nùs nhơm rơcăng lài, kràñ cê jơh nùs mờ tam klăc, càr gam bơ̆t bơtàu pang kơryan gơ in kơnhăp ngan, nàng kờñ hoàc hươr rơ̆p gơmù uă ngan rlau jơh mờ niam ờdo ờdă bơh tơl nă làng bol dê sùm geh ơn lài khà dùl.