Hìu bơsram kấp 1 - Kấp 2 Sa Loong, sàh Sa Loong, càr Quảng Ngãi tŭ do geh 36 ơdŭ mờ rơlao 1 rơbô 100 nă kơnòm bơsram, tàm hơ̆ geh tus 90% là oh kòn làng bol ală jơi bơtiàn ờ gal cau bè Sơdàng, Kadong, Jeh Triêng, Bơnhàr, Brâu, Êđê, Mường, Tày… Nam bơsram tus, broă lơh hìu bơsram kờp dŭ gơguh tus 40 ơdŭ mờ geh di pơgăp 1 rơbô 250 nă kơnòm bơsram. Hìu bơsram Kấp 1 - kấp 2 Sa Loong geh rơwah nàng lơh gơs hìu bơsram ơm sa bic tơn 2 kấp, drơng oh kòn tàm gùt sàh do in.

Do là gùng dà broă lơh dờng, dong kờl kơnòm bơsram tàm tiah nhàr lơgar geh tơl bơta niam nàng bơsram sră niam rơlao. Ồng Nguyễn Hữu Phượng, Lam bồ Hìu bơsram kấp 1 - Kấp 2 Sa Loong pà git, tŭ do hìu bơsram geh 70 nă kwang bàng, cau pơgru, cau lơh broă. Hìu bơsram neh bơyai lơh bơto 2 ƀùi tàm 1 ngai tàm uă nam do, mơya ờ hềt tơl phan bơna nàng bơyai lơh ơm sa ngai tơn ai kơnòm bơsram in. Tŭ do, hìu bơsram gam pơgồp bal mờ Anih duh broă Làng bol sàh Sa Loong mờ ală sờh, gah lơh broă gơrềng bal nàng rề ơnàng bă ù ai broă lơh hìu bơsram 2 kấp, ơm sa bic tơn in jăt mờ jơnau sồr bơh Ƀộ Bơto bơtê mờ Bơsram bal mờ bă ù ơnàng ờ uă ngan 5 lồ. “Tơnơ̆ mờ tŭ geh jơnau yal, bơh ngai 03 nhai 11 nam 2025 rơ̆p bơyai lơh sơm đờm mŭt lơh, den tàng ală gah, mpồl lơh broă, ală kấp gam jal mhar lơh niam wơl mờ ai tơlik jơnau pal jăt nàng lơh di tơngai geh ai. Tŭ do, jơdŭ bơsram bơh ală kơnòm bơsram kung gam tơl; broă lơh hìu bơsram rơ̆p geh lơh tàm bơnah bă ù geh ai tai, ờ lơh gơrềng tus mờ broă bơsram sră bơh ală kơnòm bơsram dê. Ală cau kơ̆p kờñ, gùng dà broă lơh do gờñ geh lơh nàng làng bol geh tơl bơta niam dờp broă dong kờl bơh Dà lơgar dê ai tiah nhàr lơgar in”.

Jăt ồng Nguyễn Ngọc Thái, Kwang lam bồ Sờh Bơto bơtê mờ Bơsram càr Quảng Ngãi đơs, lơh jăt gùng dà broă lơh bơh Cíñ phủ dê, càr Quảng Ngãi lơh 9 hìu bơsram kấp 1 mờ kấp 2 ơm sa bic tơn tàm 9 sàh tiah nhàr lơgar càr dê. Tàm tơngai sơnrờp (nam 2025), càr rơ̆p sơn đờm mŭt lơh tàm 4 sàh, tàm hơ̆ geh Dục Nông, Sa Loong, Rờ Kơi mờ Mô Rai; kờp jơh priă bơcri lơh rơlao 1 rơbô tơmàn đong. Ồng Nguyễn Ngọc Thái pà git tai, tàm nam 2025, Cíñ phủ neh tă ai càr in 117 tơmàn đong, bơnah priă gam tai rơ̆p tă tàm nam 2026: “Broă tŭ do gam gơkòl, mơya jơh ală sờh, gah lơh broă ndrờm kờñ bal. Đơs bal là ù tàm sàh dê den neh jơh, mơya bơnah bă ù ai nàng lơh gah bơto bơtê in den ờ hềt geh ai. Den tàng tŭ do pal geh lơh wơl, bơtơl wơl broă rơndăp ù tiah bè lơi nàng ai geh bă ù, bơyai lơh hìu bơsram tàm tơngai gờñ ngan”.

Càr Lâm Đồng geh 5 sàh tiah nhàr lơgar tàm ù gờl là Tuy Đức, Quảng Trực, Thuận Hạnh, Thuận An mờ Đắk Wil. 5 sàh do tŭ do geh 47 hìu bơsram mờ 39 hìu bơsram dà lơgar lơh, 5 hìu bơsram bơdìh mờ dà lơgar lơh. Tàm hơ̆ mìng geh 1 hìu bơsram jơi bơtiàn ơm sa bic tơn. Lơh jăt jơnau sồr bơh Anih duh broă Làng bol càr dê, Sờh Bơto bơtê mờ Bơsram càr Lâm Đồng gam pơgồp bal mờ ală gah lơh broă bal mờ gơnoar atbồ 5 sàh, lơh jăt rơndăp broă lơh tơl sàh 1 hìu bơsram ơm sa bic tơn 2 kấp. Jăt mò Lê Thị Bích Liên, Kwang lam bồ Sờh Bơto bơtê mờ Bơsram càr Lâm Đồng đơs, neh geh 2 sàh tiah nhàr lơgar là sàh Thuận An mờ Quảng Trực gam lơh ngan nàng rơcang tơl phan bơna mờ rơ̆p sơm đờm mŭt lơh mơ tàm nam 2025 do. Tơl hìu bơsram geh 30 jơdŭ, tơl nàng bơto mờ bơsram ai di pơgăp 1 rơbô nă kơnòm bơsram in.

Mò Lê Thị Bích Liên chờ hờp đơs, ală broă lơh do kơ̆p kờñ rơ̆p dong kờl kơnòm bơsram tàm tiah nhàr lơgar geh anih ơm, sa, bơsram sră kơl jăp, pơgồp bal tàm broă bơtàu tơnguh cau lơh broă mờ tơnguh broă sền gàr dà lơgar lơngăp lơngai tàm tiah nhàr lơgar. “Tàm sàh Quảng trực mờ sàh Thuận An geh Ƀộ Bơto bơtê mờ Bơsram ai tàm khà măt bơcri priă, priă bơcri là 114 tơmàn đong mờ sồr sơn đờm mŭt lơh lài mờ ngai 19 nhai 12 nam 2025. Tus tŭ do, sàh Thuận An neh tơl ală bơta phan mờ Mpồl atbồ rơndăp broă lơh 3 gam lơh ală sră nggal nàng yal, lơh ngan tus lồi nhai 10 do rơ̆p lơh gơs mờ bồ nhai 11 tus rơ̆p mŭt lơh. Gam tàm sàh Quảng Trực gam lơh jăt broă tơm ntrờn ù tiah, lơh ngan tus lồi nhai 12 rơ̆p sơn đờm mŭt lơh”.

Lơh jăt gùng dà broă lơh bơh Ƀộ Cíñ trị dê bè lơh mpồl hìu bơsram ai ală sàh tàm tiah nhàr lơgar in, tàm nam do, càr Dăk Lăk rơ̆p sơn đờm mŭt lơh 3 rơndăp broă lơh hìu bơsram ơm sa bic tơn 2 kấp mờ kờp jơh priă bơcri rơlao 390 tơmàn đong. Ală hìu bơsram do geh lơh tàm 3 sàh tiah nhàr lơgar là Ia Lốp, Ia Rvê mờ Buôn Đôn mờ rơ̆p sơn đờm mŭt lơh dơ̆ lĕ tơn tàm bồ nhai 11 tus. Ƀí thư Tỉñ ủy càr Dăk Lăk ồng Lương Nguyễn Minh Triết đơs là, Ia Lốp là dùl tàm 7 sàh ờ tơrgùm bal càr dê, geh bơta krơi is tiah nhàr lơgar den tàng geh bơta ƀuơn, mờ kong gơtìp mờ uă bơta lòng tài ù tiah ơnàng, ƀòn ơm kis rah rài ờ tơrgùm bal, khà hìu rơƀah mờ pa lik klàs rơƀah gam uă.

Ƀí thư Tỉñ ủy sồr sàh do đal sền loh làng bơta geh, bơta pràn, bơsong bơta ờ pràn, tam gơl pa bồ tơngoh nàng bơtàu tơnguh kơl jăp tàm tơngai pa. “Kung kòn bơnus hơ̆ sơl, sàh hơ̆ bŭ lah bơta geh, bơta pràn, jơnau kờñ broă lơh tŭ do kung uă rơlao ngan, kơnòl broă lài do bơh sàh lài do dê mìng 197 kơnòl, tŭ do gơguh tus 1 rơbô 65 kơnòl broă. Den tàng pal ai lài wơl gơnoar broă, bơta pràn bơh sàh dê nàng bơh tŭ hơ̆ ai geh wơl gùng dà broă lơh, broă bơyai lơh broă, nùs nhơm kơlôi sơnơng mờ bồ tơngoh bơh sàh dê. Bồ tơngoh pal gùt plai ù, nùs nhơm kơlôi sơnơng pal dà lơgar mờ lơh broă den sàh bal mờ ală kwang bàng pa geh dờp broă lơh geh sồr tam gơl tŭ do”