Ngai mŭt bơsram, 25 nă kơnòm bơsram ơdŭ 1A, hìu bơsram Kấp 1 mờ Kấp 2 Nguyễn Văn Trỗi, sàh Ia Mơ, càr Gia Lai chờ hờp tàm ào mpha pa. Ờ gam ală dơ̆ ngòt ƀàs sìl lài ngan tai, tài ngai bơh lồi nhai 8, ală oh geh pơgru Hà Thị Hậu rò lòt tus hìu bơsram nàng lơh kwèng mờ bơta niam hìu bơsram dê. Bơh broă ơm di anih nggui, sền wơl sră măi, sră cih, phan ngui bơsram tus mờ broă bơsram soh phan ndrờm bal, ală oh rơhời mŭt tàm tiah pa. Bal mờ ală kơnòm bơsram bơh ngài, pơgru Hậu gam tus tơl hìu nàng pơlam.

Pơgru Hà Thị Hậu pà git: “Tàm do pơgru pơlam ală oh in tam lùp bal, lòt rê bè lơi, lơh jăt kơrnoăt tàm ơdŭ bơsram, ală jơnau cih, jơnau pal jăt. Bè pơgru sơn-io rùp wil là ală oh kwan tê tềng kơ ƀàng; mờ sồr ală cau mè bèp blơi sră măi, sră cih, rơcaqng phan soh… Rơ̆p mŭt ơdŭ 1, ală oh gam uă ngan jơnau ờ git lài”.

Tàm tŭ kơnòm bơsram bồ kấp chờ hờp lòt tus hìu bơsram, ală cau pơgru bal mờ cau mè bèp tàm hìu bơsram kấp 1 mờ kấp 2 Nguyễn Văn Trỗi neh rơcang nàng oh kòn in mŭt tàm nam bơsram pa mờ bơta geh tơl niam ngan. Lŏ Phạm Thị Hương, cau mè kơnòm bơsram tàm ƀòn Klăh, sàh Ia Mơ, càr Gia Lai pà git: “Añ rơcang sră măi, sră cih, gai cih, ào mpha; lơh niam bồ tơngoh tơnơ̆ mờ tŭ ơm rơlô bơkang, lơh jăt niam tŭ jơ, bơta niam bơsram sră nàng kòn lòt bơsram git rơlao; cĭt vaccines rơcang kơrian mờ ală bơta kòp gơtờp”.

Tàm sàh bồt Nhơn Châu, Hìu bơsram kấp 1 mờ kấp 2 Nhơn Châu tàm nam bơsram do wă 207 nă kơnòm bơsram, tàm hơ̆ geh 9 ơdŭ. Pơgru Hồ Thị Lai, Phó Kwang lam bồ hìu bơsram pà git, hìu bơsram geh 19 nă kwang bàng, cau pơgru, cau lơh broă. Phan bơna di pal mờ jơnau kờñ bơto bơsram, mơya rài kis cau pơgru tàm tiah bồ ngài kung gam uă kal ke, glar bòl, broă lòt rê gơtìp kal ke, tàm hơ̆ uă ngan tàm kàl mìu càl dờng. Nàng pơlam, hìu bơsram neh ai tiah hìu ơm lơh kơnòl broă in, dong kờl cau pơgru iang nùs mờ đềt mềr mờ broă bơto.

Lài mờ hơ̆, hìu bơsram gam pơgồp bal mờ ală mpồl lơh broă mpồl bơtiàn, dong kờl dùl bơnah sră măi mờ sră cih ai kơnòm bơsram in, pơgồp bal tàm broă tơmù kal ke tus mờ cau mè bèp kơnòm bơasram tàm sàh bồt do in: “Mờ bơta kis tàm sàh bồt gam gơtìp kal ke, sră măi jăt broă bơsram pa kung kas priă. Cau mè bèp gơtìp kal ke kung đơs uă sơl. Git bơta do, hìu bơsram kung pơlam gùt mpồl bơtiàn tă bal. Tŭ do neh lam tă geh sră măi pa ai alăkơnòm bơsram ơdŭ 6 tus ơdŭ 9 in mờ sră cih tơl ală kơnòm bơsram rơ̆p mŭt nam bơsram pa in”.

Ồng Phạm Văn Nam, Kwang lam bồ Sờh Bơto bơtê mờ Bơsram càr Gia Lai pà git, tơnơ̆ mờ tŭ tơrgùm bal càr, gùt càr tŭ do geh 1 rơbô 396 hìu bơsram mờ rơlao 33 rơbô nă cau pơgru. Mơya, mŭt tàm nam bơsram pa 2025-2026, gah do kung gam ờ tơl tus 3 rơbô 532 nă cau pơgru mờ cau lơh broă pơn drờm mờ jơnau kờñ geh ai. Ờ mìng ờ tơl bè cau lơh broă, phan bơna tàm uă tiah, tàm hơ̆ uă ngan tàm tiah nhàr lơgar mờ tiah bồt dà lềng, kung ờ hềt di pal mờ jơnau kờñ bơto mờ bơsram. Pa do, Sờh Bơto bơtê mờ Bơsram neh bơyai lơh lòt sền tàm 7 sàh tiah nhàr lơgar đah măt tơngai mŭt mờ ai geh jơnau sồr bơ̆t bơtàu broă lơh hìu bơsram ơm tơn pơgồp bal kấp mờ kờp jơh priă bơcri rơlao 1 rơbô 200 tơmàn đong. Ală broă lơh do geh lơh tơl bơh ơdŭ bơsram, hìu ơm bal, hìu sa, ƀlàng nhơl tus mờ broă lơh sơnơm tàm hìu bơsram, drơng rơlao 9 rơbô 400 nă kơnòm bơsram, nggùl khà là oh kòn làng bol jơi bơtiàn ờ gal cau. Kờp dŭ, geh ờ uă rơndăp broă lơh rơ̆p mŭt lơh tàm nam 2025 mờ ai ngui bơh nam bơsram 2026-2027.

Do là bơta kwơ màng nàng dong kờl tơnguh uă bơta niam broă bơto bơtê mờ bơsram tàm ală tiah kal ke in. Nàng di tŭ di pal mờ jơnau kờñ nam bơsram pa, Sờh do neh dan mờ Anih duh broă Làng bol càr Gia Lai lơh broă rơndăp lơh nàng rơwah, bơtơl khà cau pơgru gam ờ tơl, tàm hơ̆ uă ngan là tàm ală môn bơsram pa jăt Broă bơto ală kấp nam 2018 dê. “Sờh dan Anih duh broă Làng bol càr lơh broă rơndăp lơh nàng rơwah tơl 1 rơbô 428 nă cau pơgru; sền gròi rơwah cau pơgru pa bơto môn pa bơh broă bơto kấp bơsram 2018, broă bơto 2 ƀùi tàm 1 ngai, broă bơto bơtơl mầm non ai kơnòm dềt bơh 3 tus 5 sơnam in; lơh broă rơndăp pơdar, rơndăp tăp sèng cau pơgru tàm tiah jơnkah bơto ai tiah ờ tơl in nàng tơmù bơta jơnkah-ờ tơl tàm tơl tiah, tơl ƀòn lơgar”.

Mờ broă tus bal bơh hìu bơsram, gơnoar atbồ bal mờ cau mè bèp, kơnòm bơsram tàm tiah nhàr lơgar, tiah bồt tàm càr Gia Lai bŭ lah gam uă kal ke mơya kung gam pin dờn mŭt tàm nam bơsram pa tàm nùs nhơm chờ hờp ngan.