Pơgăp mờ do tòm 80 nam, ngai 23/09/1945, Tỉñ ƀộ Việt Minh Dăk Lăk neh lơh nền tơnggơs Mpồl Ling klàng càr, rơndăp mpồl phàu crong tờm là Mpồl dềt Tơngklàs ling N’Trang Lơng mờ bơ̆t bơtàu ală anih ling klàng bơh càr tus kâp hơđơm. Sơrlèt rlau 80 nam tam lơh mờ dờng kràñ, ală rơnàng kwang bàng, cau ling neh sùm tă pơgồp dà kơlhề, phi să, pơgồp bơnah sền gàr Dà lơgar tờm, gơgơs anih kơldìng kơ̆ kơnhăp Đảng dê, Dà lơgar dê mờ Làng bol dê.

Bal mờ tơngume “Kơnhăp jơng cơnđoà lòt tềng đăp bồng bi ling klàng lơh tus jai” dê, dơ̆ tìp măt lơh kwèng cèng tus ală jơnau yal, jơnau kah kir wơl bơh ală rơnàng đơng lam dê tàm ală nam nhai bòl glar kal ke, yal bal bè jơnau sồr bơ̆t bơtàu mpồl tàm tơngai pa. Rơnàng kơnòm să ngai do kung tơlik nùs nhơm lơh ngan jơh nùs tàm pơn jăt tàm pơdờn, đòm jăt bơhiàn ồng bèp dê, gàr kơnhăp bơta pin dờn mờ bơta niam kăc màng dê. Dơ̆ do, Gah Đơng lam ling klàng càr pơgồp bal mờ Tỉñ đoàn càr Dăk Lăk tơn jơh dơ̆ pơrlòng tàm internet jòi gĭt 80 nam Ngai bơhiàn mpồl phàu crong càr, jàu 28 khà jờng ai mpồl cau, cau nă să is in lơh geh cồng nha jak ngan.