Lòt gan 5 dơ̆ bơyai lơh, bơta gơ rề uă bơh Dơ̆ pơrlòng dê ngai sơlơ jrô ơnàng làm uă, mờ ală jơnau cih tus bal nam tơnơ̆ uă rlau mờ nam lài. Dơ̆ pơrlòng dơ̆ 1 geh 8 rơbô 129 jơnau cih tus bal pơrlòng, tus nam do neh gơguh tus mờ 541 rơbô 766 jơnau cih.

Đơs pơndŭt tàm pơrjum, ồng Nguyễn Xuân Thắng, Kwang lam bồ Hìu bơsram kơlôi sơnơng cíñ trị Dà lơgar Hồ Chí Minh, Lam bồ Mpồl đơng lam dơ̆ pơrlòng cribơyai cíñ trị bè sền gàr bơta tờm bồ tơngoh bơh Đảng dê đơs sùm: Dà lơgar gam mut tàm rài bơtàu tơnguh pa mờ nùs nhơm pa, mờ bơhiàn kờñ gơboh Dà lơgar, bơta kơ̆p kờñ bơtàu tơnguh, nùs nhơm tam klăc bal, nùs nhơm lơh tờm is, pin dờn, lơh is, pràn is, pơn yờ să jơi bơtiàn geh lơh kah wơl mờ lơh jat niam bơta pràn kơl dang. Nàng lơh geh jơnau kờñ mut tàm rài bơtàu tơnguh pa mờ nùs nhơm pa, Jơnau rcang cih Sră nggal Pơrjum dờng dơ̆ 14 bơh Đảng dê jàu Hìu bơsram kơlôi sơnơng Cíñ trị Dà lơgar Hồ Chí Minh đơng lam, pơgồp bal mờ Mpồl Sồr lơh 35 Dà lơgar, Mpồl mblàng yal, Bơto bơtê mờ Hòi jà làng bol Dà lơgar, Mpồl Sồr lơh 35 kấp càr tam gơl pa broă lơh, lơh broă bơyai lơh Dơ̆ pơrlòng cribơyai cíñ trị bè sền gàr ală bơta bồ tơngoh bơh Đảng dê.