Đơs tàm dar tơn jơh pơrjum, Tổng Ƀí thư ồng Tô Lâm, đơs loh, Pơrjum dơ̆ 13 Mpồl duh broă Đảng dà lơgar khoă 13 neh lơh sir jơh ală tơngume, broă lơh geh ai. Tàm pơrjum tơl broă geh rcang niam ngan, cribơyai jrô loh làng, lơh nền tơnơ̆ pơrjum mờ bơta ring bal uă, tàm hơ̆ geh uă tơngume geh gơrềng tơn tus bơta geh cồng nha bơh Pơrjum dờng cau ala mat gùt lơgar dơ̆ 14 bơh Đảng, tus jơnau kờñ bơtàu tơnguh mhar, kơnhăp jŏ, tus tơnguh uă rài kis bơh làng bol dê. Pơrjum dơ̆ do neh cribơyai song dơ pă, jak chài mờ ring bal uă gùng dà broă lơh, lơh nền broă lơh kwơ màng.

Tàm hơ̆, Mpồl duh broă Dà lơgar ring bal ală Sră nggal yal mờ Pơrjum dờng dơ̆ 14 bơh Đảng dê; ring bal yal tơngĭt kwang bàng Mpồl duh broă Dà lơgar mờ Anih duh broă Sền sơ wì Dà lơgar khoă 14; tă pơgồp jơnau đơs bè tŭ tơngai, tơngume, broă lơh, kơrnoat lơh broă, kơrnoat tĕ khà bơh Pơrjum dờng Đảng gùt lơgar dơ̆ 14 mờ gùng dà broă lơh gàr niam di kơrnoat boh lam, tam gơl pa, jak chài, geh cồng nha mờ ngan ngồn.