Drim òr (01/12), Tổng Ƀí thư ồng Tô Lâm bal mờ pơ ùr mờ Mpồl kwang bàng ala  mat kấp dờng lơgar he dê neh tus càr lơgar Vientiane, sơnđờm ală broă lơh tàm tơngume broă lơh còp kấp Dà lơgar tus lơgar Lào, tus bal dơ̆ tơngkah kir sơnrai 50 nam ngai Sơntờm Dà lơgar Lào mờ đơng lam bồ Dơ̆ tìp mat kấp dờng đah Đảng kộng sản lơgar Việt Nam mờ Đảng Ñân zân Kăc màng lơgar Lào.

Dơ̆ wă rò ngan ngồn Tổng Ƀí thư ồng Tô Lâm bal mờ pờ ùr mờ Mpồl kwang bàng ala mat kấp dờng lơgar he dê geh bơyai lơh yŭ rơyùm tàm Hìu lơh broă Củ tịc jat broă lơh dờng màng ngan rlau jơh lời ai kwang đơng lam bồ Dà lơgar dê. Tổng Ƀí thư, Củ tịc lơgar Lào ồng Thongloun Sisoulith đơng lam dơ̆ wă rò. Dơ̆ lòt lơh  broă bơh Tổng Ƀí thư ồng Tô Lâm dê là tềl lời wơl kwơ màng mờ tơl lơgar mơkung lời tềl lời wơl ală broă lơh dờng pràn bơh bơta gĭt gơ̆p oh mi Việt Nam mờ Lào, geh lòng bơh tàm bơta kal ke rài tam lơh, bơh ală dơ̆ tam lơh jŏ jòng kal ke tus broă lơh bơt bơtàu, sền gàr, bơtàu tơnguh Dà lơgar bơh 2 jơi bơtiàn dê, nàng bơh hơ̆ lơh nền wơl bơta gĭt gơ̆p lam lài, jơh nùs, niam ngan, ờ hoan geh ngan tàm bơta gĭt gơ̆p ală lơgar dê. Dơ̆ lòt còp dơ̆ do bơh Tổng Ƀí thư ồng Tô Lâm dê đơs nền nùs nhơm lơh ngan bơh 2 Đảng, 2 Dà lơgar tàm broă pơn jat tai sền gàr, bơt bơtàu mờ bơtàu tơnguh bơta gĭt gơ̆p lam lài tài ring lơngai, kơ̆ kơl jăp mờ bơtàu tơnguh kơnhăp jŏ bơh tơl lơgar mờ jơh bal tiah do dê.