Tổng Ƀí thư đơs, bulah pa tơnggơs, khà làng bol ơm kis dồ ết, ală bơta geh is kal ke, gùng lòt rê đah ală bồt gam uă kal ke, mơya Thổ Châu den gàr gơnoar tiah kơdìng kwơ màng, sền gàr bơta lơngăp lơngai tàm tiah dà lềng đah jum mat tơngai mut mờ tiah nhàr lơgar bơh Dà lơgar dê.

Đơs nền bơta kwơ is ồn bè sền gàr Dà lơgar- lơngăp lơngai lòt bal mờ bơta ƀuơn bơta pràn lơh sa, Tổng Ƀí thư sồr ală kấp jơh nùs bơt bơtàu Thổ Châu gơ gơs dà lềng bồt pơn yờ să, kơnhăp jŏ, tờm ngan tàm bơtàu tơnguh bơh lơgar Việt Nam dê, mờ nùs nhơm “Tiah lam ơhò lik tus dà lềng dờng; gàr dà lềng, gàr làng bol, sền gàr lơngăp lơngai Dà lơgar. Tổng Ƀí thư tơngkah càr An Giang pơgồp bal mờ ală Ƀộ, gah broă bơt bơtàu Rơndăp ù tiah bơtàu tơnguh kơnhăp jŏ; ai lơh lài phan bơna bơt bơtàu gùng lòt rê, tiah làng bol ơm kis kơ̆ kơl jăp; is ồn sền gròi lơh sơnơm, bơto bơtê, niam chài nàng làng bol, kwang bàng, cau ling mờ kơnòm dềt tiah bồt ngài in.