Đơs pơndŭt dơ̆ lơh broă, Tổng Ƀí thư ồng Tô Lâm đơs niam ngan jơnau đơs tă pơgồp jơh nùs jơh tồr, jrô ơnàng ngan bơh đơng lam Anih duh broă Đơng lam Đảng Ƀộ Cribơyai broă mờ lơgar ndai, Anih duh broă Đơng lam Đảng Ling klàng Dà lơgar mờ Anih duh broă Đơng lam Đảng Kwang àng Dà lơgar. Tổng Ƀí thư đơs nền nùs nhơm sồr lơh bơh Đảng dê bè lơh pràn lơh broă mờ lơgar ndai, mŭt gơrờm bal mờ ală lơgar là kơnòl broă “tờm kwơmàng, sùm sùm”, mơkung đơs wih đơs wơl bơta kwơmàng bơh pơgồp bal pe broă tờm: Sền gàr dà lơgar – lơngăp lơngai – lơh broă mờ lơgar ndai. Tổng Ƀí thư ồng Tô Lâm sồr Anih duh broă Đơng lam Đảng Ƀộ Cribơyai broă mờ lơgar ndai dê pơgồp bal niam mờ ală mpồl, ƀộ, gah, ƀòn lơgar tàm lam lơh rơcăng lài, ndrờm bal, geh cồng nha ală kơnòl broă lơh broă mờ lơgar ndai.

Tổng Ƀí thư nting tơngkah gah cribơyai broă mờ lơgar ndai gĭt nền broă gơlik geh, tơngguh uă bơta niam, cồng nha mờ bơta di tŭ bơh broă lơh kơlôi sơnơng, tă pơgồp jơnau đơs ai Đảng mờ Dà lơgar in tàm ală jơnau lơh nền gùng dà broă lơh kwơmàng. Sồr jơh gùt gah lơh broă mờ lơgar ndai lơh jăt niam gơnoar broă lơh lài lơh geh tiah ơm kis ring lơngai, kơ̆ kơl jăp, ngui niam bơta pràn ală lơgar dê nàng lơh jăt ngan ngồn jơnau kờñ bơtàu tơngguh dà lơgar tus nam 2030 mờ 2045.