Dờp jơnau jà bơh Kwang atbồ lơgar Hàn Quốc ồng Lee Jae Myung, Tổng Ƀí thư ồng Tô Lâm mờ pơ ùr bal mờ mpồl cau ala mat kwang bàng kấp dờng lơgar he dê còp kấp Dà lơgar tus lơgar Hàn Quốc bơh ngai 10 tus ngai 13/08, drim ngai 11/08, jat jiơ tiah do dê, tàm Gơlang Kwang atbồ lơgar, Kwang atbồ lơgar Hàn Quốc ồng Lee Jae Myung đơng lam dơ̆ wă yŭ rơyùm Tổng Ƀí thư ồng Tô Lâm jat bơhiàn dờng ngan rlau jơh.

Tơnơ̆ dơ̆ wă rò ngan ngồn 2 nă kwang đơng lam bồ lam mpồl kwang bàng kấp dờng 2 lơgar lơh dơ̆ cribơyai kấp dờng nàng kờñ ai tơlik ală broă lơh kwơ màng nàng pơn jat tai gàr niam mờ bơtàu tơnguh rlau tai bơta gĭt gơ̆p tam klăc lơh broă bal kwơ màng tơl làm Việt Nam mờ Hàn Quốc tàm tơngai tus. Đơs tàm dơ̆ cribơyai kấp dờng, Tổng Ƀí thư ồng Tô Lâm đơs nền: chờ hờp ngan mờ jơh nùs ưn ngài ồng Kwang atbồ lơgar Hàn Quốc neh ai bơta lơh lài is ồn jà Tổng Ƀí thư lơgar Việt Nam là năc sơn rờp tơnơ̆ tŭ Hàn Quốc geh gơnoar atbồ pa, tơngŏ bơta sền dờng màng mờ lơh lài uă ngan rlau jơh bơh lơgar Hàn Quốc mờ să tờm bơh Kwang atbồ lơgar dê gơwèt mờ bơta gĭt gơ̆p đah 2 Dà lơgar. Kwang atbồ lơgar Hàn Quốc ồng Lee Jae Myung đơs nền, bơh bơta đơng lam jak chài ngan bơh Tổng Ƀí thư ồng Tô Lâm dê, lơgar Việt Nam tŭ do gam geh bơta bơtàu tơnguh lơh sa mhar ngan, Kwang atbồ lơgar Hàn Quốc pin dờn là tàm rài tơnơ̆ do rềp lơgar Việt Nam rơ̆p gơ gơs lơgar bơtàu tơnguh mờ priă lơh geh uă.