Đơs sồr lơh tàm pơrjum, Tổng Ƀí thư ồng Tô Lâm đơs sùm tơngai lơh broă pa do, broă lơh bơt bơtàu, lơh niam wơl Đảng pơn jat tai geh lam lơh kràñ cê jơh nùs, tơl làm, tam gơl pa, pơgồp bơnah tơnguh uă bơta pràn jak đơng lam, bơta pràn jak at gơnoar mờ bơta pràn rcang lài kơryan bơh Đảng dê.

Ală nam do, Ƀộ Cíñ trị, Ƀan Ƀí thư mờ kấp ủy ală kấp neh lòt sền rlau 232 rơbô mpồl Đảng mờ rlau 1 tơlak 200 rơbô nă Đảng viên; jơnau pơndŭt sồ 545 mpồl Đảng mờ 4 rơbô 213 nă đảng viên lơh tìs, lơh ờ niam. Nàng tơnguh uă cồng nha lơh broă tàm tơngai tus, Tổng Ƀí thư sồr ală kấp ủy, mpồl Đảng, anih duh broă sền sơ wì tơrgùm lơh jat niam 5 kơnòl broă tờm, tàm hơ̆ sền gròi tơnguh uă bơta niam, geh cồng nha, jat sền bơh tàm tơl Ci ƀộ tơn, gàr niam duh rơngòt kơrnoat boh lam, bơta ring bal, sàng goh kơnhăp pràn bơh Đảng dê.