Tàm dơ̆ tus còp mùl màl lơgar Phần Lan, ngai òr (21/10), Tổng Ƀí thư ồng Tô Lâm mờ Pơ-ùr mò Ngô Phương Ly neh tìp mờ kwang bàng, cau lơh broă ală anih lơh broă ala măt lơgar Việt Nam mờ ala măt mpồl bơtiàn cau lơgar Việt Nam tàm lơgar Phần Lan, Đan Mạch, Thụy Điển mờ Na Uy.

Tổng Ƀí thư tơlik nùs nhơm ngoh rơngăc ngar tềng đăp mờ nùs nhơm bơh làng bol lơgar Việt Nam, do là ală “cau ala măt niam chài” pơgồp bal tàm broă bơ̆t bơtàu bơta git gơ̆p, lơh bơyô bal đah lơgar Việt Nam mờ ală lơgar tàm tiah đah Tô câu Âu. Tổng Ƀí thư đơs nền, Đảng mờ Dà lơgar sùm sền mpồl bơtiàn cau lơgar Việt Nam tàm lơgar bơdìh là bơnah ờ gơtùi tam cah is jơi bơtiàn dê, là bơta pràn kwơ màng ai broă bơ̆t bơtàu mờ sền gàr Dà lơgar dê. Jơnau yal bè lơh sa mpồl bơtiàn mờ broă rơcang Pơrjum dờng XIV Đảng dê, Tổng Ƀí thư đơs nền dà lơgar gam mŭt tàm tơngai bơtàu tơnguh pa, wèt tus jơnau kờñ làng bol pas gơs, dà lơgar pràn kơl dang, làng bol lơh tờm, ndrờm bal, gơguh jăk.