Mho ngai 27/08, tàm Hà Nội, geh lơh dơ̆ bơyai lơh tơngkah kir sơnrai 80 nam ngai tơnggơs Ƀộ Broă dơlam is mờ Pơrjum dờng Tàm pơrlòng gơboh lơgar dơ̆ I, nàng kờñ yal wơl gùng lòt pơnrơ ngan mờ kah rơngal wơl ală rơnàng đơng lam, kông cựk, viên cưk,…gah broă dơlam is nàng pin dờn kơnhăp cơnđoà lòt mŭt tàm rài pa bal mờ bơta kơ̆p kờñ ngan tă pơgồp dà kơlhề tài dùl Việt Nam pas sơm dờng pràn. Ala măt ală oh mi đơng lam Đảng, Dà lơgar ki ngàm pà Huân cương Lơh broă khà Dùl ai Ƀộ Broă dơlam is in, Tổng Ƀí thư ồng Tô Lâm đơs nền, bulah ơm tàm khăt tŭ tơngai lơi- rài tam lơh halà rài ring lơngai, bơ̆t bơtàu halà tam gơl pa- gah broă dơlam is sùm là mpồl cau kơ̆ dơn dòn song, jơh nùs jơh tồr, bơceh lơh, pơgồp bơnah tơn bơceh mòn geh rài ătbồ broă dà lơgar mờ sền gròi niam rài kis mpồl bơtiàn.

Tổng Ƀí thư sồr jơh gùt gah broă dơlam is pơn jăt tai lơh jăt niam gơnoar broă tờm tàm tă pơgồp jơnau đơs mờ lơh jăt broă lơh dong kờl sền gàr niam rài kis mpồl bơtiàn pal tơl làm, glòm jơh, geh cồng nha; tam gơl pa jrô ơnàng, geh pràn lơh rơnggô uă, lơh geh wơl jơnau kơ̆p kờñ ngan tă pơgồp dà kơlhề tàm rài bơtàu tơngguh pa; is ồn, lơh lài tam gơl sồ, lơh tam gơl pa sră pơ àr gơnoar ătbồ, gơgơs là rùp lam lài tàm ală anih lơh broă.