Nting bơr gờm chờ ală cồng nha pơn rơ ngan bơh Anih sơn-io rùp Việt Nam neh lơh geh tàm tơngai lài, Tổng Ƀí thư ồng Tô Lâm đơs loh, tàm tŭ tơngai bơtàu tơnguh pa, tŭ jơh gùt Đảng, gùt làng bol, gùt ling klàng he gam pơnđơl pràn, lơh ngan lơh geh cồng nha Jơnau lơh nền tàm pơrjum dờng dơ̆ XIII bơh Đảng dê, wèt tus Pơrjum dờng cau ala mat gùt lơgar dơ̆ XIV, den tàng Anih sơn-io rùp Việt Nam pal sơlơ ai tơnggŏ nùs nhơm kơ̆ dơn, là gah tờm ngan bơt bơtàu bơta pin dờn mờ lơh geh bơta ring bal tàm mpồl bơtiàn. 

Tổng Ƀí thư ồng Tô Lâm sồr, Anih sơn-io rùp Việt Nam pal lơh pràn broă tam gơl sồ tơl làm, bơtàu tơnguh ală gah mblàng yal jơnau li la bơta măi mok, wèt tus gơs là Jơnum tơrgùm mblàng yal jơnau măi mok sồ dà lơgar pa ngan, lơh broă jat broă lơh tơrgùm bal, ngui măi mok sồ tơl làm, lam lài tàm broă lơh gơlik mờ pờ tơlik ală tơngume geh bơta niam uă, li la bơta măi mok, li la dà đơs, ngui măi mok pa nàng drơng cau sền tàm lơgar mờ bơdìh lơgar in, pơgồp bơnah sền gàr kơ̆ gơnoar tờm yal jơnau tơnggit dà lơgar, tơnguh gơnoar broă Việt Nam tàm sră wac rùp mblàng yal jơnau ală lơgar.