Ala mat ală kwang đơng lam bồ Đảng, Dà lơgar jàu Gai lòng Hồ Chí Minh pà Anih yal jơnau tơnggit Việt Nam, Tổng Ƀí thư ồng Tô Lâm jờng rơ ală dà kơl hề, bơta tă pơgồp bơh ală rơnàng đơng lam, kwang bàng, cau cih ƀău, cau drơng măi mok, cau lơh broă Anih yal jơnau tơnggit Việt Nam dê bơh ală tŭ tơngai gơ wèt mờ broă lơh kac màng bơh Đảng mờ jơi bơtiàn dê kung bè pơgồp bơnah lơh gơs jơnau kah yau geh cih jat tơl tŭ tơngai mùl màl bơh rài sră ƀău kac màng Việt Nam dê; đơs nền, 80 nam do, Anih yal jơnau tơnggit Việt Nam sùm là anih yal jơnau tơnggit kuơmàng, anih sră ƀău tờm ngan tàm ală mpồl mblàng yal jơnau dà lơgar. 

Tổng Ƀí thư sồr, tơngai tus, ală cau lơh ƀău Anih yal jơnau tơnggit Việt Nam kờñ pal sơlơ pơlam tàp bồ tơngoh cíñ trị kơ̆ dơn, jơh nùs dòn song mờ gùng dà kac màng, đơs nền gơnoar broă là ală cau lam lài, lơh gơs jak ngan tơl kơnòl broă mờ Đảng, Dà lơgar jàu, yal tơnggit làm uă gùng dà, broă lơh, adat boh lam mờ cồng nha bơtàu tơnguh bơh Việt Nam dê, pơgồp bơnah tơnguh tai bơta pin dờn mờ bơta ring bal tàm mpồl bơtiàn, mblàng wơl bơta kờñ gơboh mờ lơh geh bơta kơp kờñ tă pơgồp bơh jơh gùt mpồl bơtiàn dê ai broă lơh bơtàu tơnguh dà lơgar in.