Đơs sơnđờm mut pơrjum, Tổng Ƀí thư ồng Tô Lâm pơlam gùng dà 2 mpồl broă nàng Dà lơgar in kơlôi sơnơng, sền sơwì, tă pơgồp jơnau đơs. Bè broă lơh rcang pơrjum dờng dơ̆ 14 bơh Đảng dê, Tổng Ƀí thư đơs loh, tàm Pơrjum do, Ƀộ Cíñ trị yal Dà lơgar tă pơgồp jơnau đơs sră yal bè cồng nha mờ gùng dà broă lơh yal tơngĭt kwang bàng mut bal tàm Mpồl duh broă Dà lơgar khoă 14, tus  bal Kwang bàng Anih duh broă sền sơ wì Dà lơgar khoă 14 mờ lơh dơ̆ pờ tê ring bal yal tơngĭt kwang bàng Mpồl duh broă Dà lơgar, Anih duh broă sền sơwì Dà lơgar jat jơnau sồr.

Đơs sùm, do là broă lơh “is ồn kwơ màng”,  “tờm ngan bơh tờm ngan dê”, là bơta lơh nền geh cồng nha bơh Pơrjum dờng dơ̆ 14 bơh Đảng mờ bơta bơtàu tơnguh bơh Dà lơgar dê tàm tơngai tus, Tổng Ƀí thư ồng Tô Lâm sồr tŭ rơ wah yal tơngĭt kwang bàng pal jat tàm bơta tơl khà, tơl ală bơta, rơndăp tăp sèng, khà cau jat gùng dà broă lơh kwang bàng Pơrjum dờng dơ̆ 14 bơh Đảng dê mờ ală jơnau sồr geh gơrềng. Pal ơn bơta kwơ bơh Đảng, bơh Dà lơgar, jơi bơtiàn dê hơđang ngan rlau jơh, lài ngan rlau jơh, bơnĕ bơnài bal đah tơl khà mờ rơndăp tăp sèng; đah tàm pơrdờn, bè ờs mờ bơtàu tơnguh; đah yal tơngĭt mờ bơta is ồn; đah ờs mờng bơto bơtê mờ bơta pràn să tờm, bơta pràn jak geh ngan; đah bơngă pin dờn, mờng chài rơ̆ ru mờ gùng lòt bơtàu tơnguh; tàm hơ̆ is ồn jờng rơ cồng nha lơh geh, geh cồng nha, phan bơna lơh broă, bơta tă pơgồp bơh kwang bàng dê nàng lơh bơnàng jă, bơta đo was tàm sac rơwah dê.