Drim ngai 13/10, tàm càr lơgar Hà Nội, Pơrjum dờng cau ala mat Đảng ƀộ Cíñ phủ dơ̆ I, tơngai lơh broă bơh nam 2025-2030 ngan ngồn sơnđờm mut pơrjum. Tổng Ƀí thư ồng Tô Lâm tus bal mờ đơs đơng lam. Ala mat Ƀộ Cíñ trị, Ƀan Ƀí thư, Tổng Ƀí thư jơh nùs jờng rơ ală cồng nha pơn rơ mờ Đảng ƀộ Cíñ phủ dê neh lơh geh tàm tơngai lơh broă bơh nam 2020-2025, ngan là tàm broă đơng lam, sồr lơh broă lơh bơt bơtàu kơrnoat boh lam, bơtàu tơnguh lơh sa- mpồl bơtiàn, rcang lài kơryan kòp mờ bè ờs rài kis làng bol dê.

Tổng Ƀí thư đơs sùm, Đảng ƀộ Cíñ phủ pal pơn jat tai là krơh niam lam lài bè nùs nhơm khin cha cíñ trị, bồ tơngoh kơlôi sơnơng, nùs nhơm lơh kơnòl broă Dà lơgar mờ tam gơl pa bơceh lơh; là anih tờm tam klăc bal, ring bal nùs nhơm mờ broă lơh tàm jơh gùt mpồl lơh broă sră pơ àr gơnoar atbồ Dà lơgar. Ồng sồr bơt bơtàu Đảng ƀộ ngan ngồn sàng goh, kơnhăp pràn; jơh nùs lơh ngan lam lài, tam dră sa kuề sa kuà, pơhì pơhà mờ bơta ờ niam; lơh jat niam gơnoar Cíñ phủ “bơceh lơh bơtàu tơnguh, song dơ pă, lơh broă, drơng broă làng bol”.

Đơs sơn đờm Pơrjum dờng cau ala măt Đảng ƀộ Cíñ phủ dơ̆ I, Ƀí thư Đảng ủy Cíñ phủ, Thủ tướng Cíñ phủ ồng Phạm Minh Chính đơs nền, Pơrjum dờng là broă lơh cíñ trị kwơ màng ngan, ai tơngŏ broă lơh dờng pràn tàm broă bơ̆t bơtàu Cíñ phủ dờn song, bơceh lơh, lơh broă, tài dà lơgar, tài làng bol.

Pơrjum dờng ai jơnau kờñ tus nam 2030, lơgar Việt Nam gơs lơgar gam bơtàu tơnguh geh lơh sa mờ măi mok pa, priă geh bè ờs uă, gơwèt mpồl 30 lơgar lơh sa geh khà GDP dờng ngan tàm dunia. Gơguh lơh sa tơngai bơh nam 2026 tus 2030 pal mhar, kơl jăp, gàr niam ală broă lơh drờm bal dờng. Pơrjum dờng ai geh 10 kơnòl broă, gùng dà broă lơh tờm, tơrgùm lơh gơs gùng dà broă lơh, tơnklàs bơta pràn să jan tàm broă lơh sa, hòi jà geh ală bơta pràn, ai geh bơta pràn pa broă bơtàu tơnguh; lơh pràn broă bơ̆t bơtàu dà lơgar pa; sền bơta chài măi mok, tam gơl bơceh lơh mờ tam gơl sồ là bơta pràn lơh mhar; bơ̆t bơtàu broă bơto bơtê mờ bơsram pa, bơtàu tơnguh cau lơh broă geh bơta jăk uă.