Đơs tàm dơ̆ đơng lam Pơrjum dờng, Tổng Ƀí thư ồng Tô Lâm, Ƀí thư Anih duh broă Đơng lam Đảng Ling klàng Dà lơgar đơs loh 6 cồng nha pơnrơ ngan mờ Đảng ƀộ Mpồl Ling klàng neh lơh geh tàm tơngai lơh broă pa do, tàm hơ̆ geh broă lơh ndrờm bal 6 mpồl gùng dà broă lơh bơ̆t bơtàu mpồl ling klàng pràn kơl dang bè cíñ trị geh ai tàm Jơnau lơh nền tàm Pơrjum dờng Đảng ƀộ Mpồl Ling klàng dơ̆ XI, Anih duh broă Đơng lam Đảng Ling klàng Dà lơgar neh sồr lơh bơtơl uă gùng dà broă lơh mùl màl, di pal, gơdờp mờ jơnau kờñ bal mờ broă bơtàu tơnguh bơh bơta dê.

Is ồn, kwang bàng, cau ling sùm là mpồl tờm, lam lài, lòt lài tàm broă rơcang kơrian rềs àr bơh trồ tiah, kòp gơtờp, jòi dong klàs cau gơtìp rềs àr; ờ ngòt glar bòl, phi să, tŭ lơi kung rơcang lài gŏ măt tàm ală tiah gơtìp, ngòt rơngơ̆t nàng dong klàs, sền gàr màng kis, phan bơna làng bol, gùt lơgar mờ ală lơgar dê. Tổng Ƀí thư sồr, lơh pràn broă bơ̆t bơtàu ling klàng làng bol kăc màng, pràn, ngăc ngar, lơh pa. tàm hơ̆, ală bơta tờm “kăc màng, pràn kơl dang, ngăc ngar” neh sùm geh lơh mờ bơtàu tơnguh sùm tàm rơlao 80 nam bơ̆t bơtàu, tam dră, pha lin mờ gơs dờng pràn bơh ling klàng dê; mơya pal pơn jăt tai geh lơh pràn, tơnguh uă rơlao tai tàm tơngai lơh broă pa.