Tàm dơ̆ wă, Tổng Ƀí thư ồng Tô Lâm đơs niam cồng nha pơrjum bơyai đah Ƀộ trưởng ồng Pete Hegseth mờ Ƀộ trưởng Ƀộ Ling klàng lơgar Việt Nam ồng Phan Văn Giang, đơs nền lơh broă bal sền gàr dà lơgar đah bàr lơgar neh mờ gam gơgơs dùl tàm ală broă tờm kwơ màng bơh git gơ̆p bàr gah dê.

Tổng Ƀí thư kơ̆p kờñ bàr đah pơn jăt tai lơh pràn lơh broă bal sền gàr dà lơgar mùl màl, jăt tàm bơnàng jă ki ngàm lơngăp lơngai is, gơnoar tờm, tơl làm ù tiah dà lơgar, ală bơta pal jăt lơh broă mờ lơgar ndai mờ sền gàr dà lơgar bơh lơgar Việt Nam dê, pơgồp bơnah tơngguh tai nùs nhơm pin dờn jŏ jòng mờ gàr niam ring lơngai, kơl jăp tàm tiah do. Bàr đah kung dùl nùs ring bal là,  broă lơh sùm tàm cribơyai mpồl kwang bàng kâp dờng mờ tìp măt boh bơr sùm đah ală anih lơh broă bàr lơgar dê, ngan là đah Ƀộ Ling klàng lơgar Việt Nam mờ Ƀộ Tam lơh lơgar Mỹ, ndrờm geh bơta kwơ màng tàm broă lơh kơ̆ kơl jăp nùs nhơm pin dờn mờ lơh jrô ơnàng tai git gơ̆p Tam klăc lơh broă bal jŏ jòng tơl làm đah lơgar Việt Nam mờ lơgar Mỹ, pơgồp bơnah tàm ring lơngai, kơ̆ kơl jăp, lơh broă bal mờ bơtàu tơnguh tàm tiah do mờ tàm dunia.