Tàm tơngume dơ̆ lòt còp ngan ngồn lơgar Phần Lan bơh ngai 20 tus ngai 22 nhai 10, tàm Helsinki, Tổng Ƀí thư Mpồl duh broă Đảng Kộng sản lơgar Việt Nam ồng Tô Lâm neh geh dơ̆ wă Củ tịc Đảng Kộng sản lơgar Phần Lan mò Tiina Sandberg.

Tàm dơ̆ wă, Tổng Ƀí thư ồng Tô Lâm pà gĭt: tàm dơ̆ lòt còp do, 2 gah neh ring bal tơnguh bơta gĭt gơ̆p Tam klăc lơh broă bal kwơ màng. Tàm tơngai tus, Tổng Ƀí thư ồng Tô Lâm sồr 2 Đảng pơn jat tai sơlơ tơnguh tai tìp mat lơh kwèng, sơlơ tơnguh tai bơta gĭt gơ̆p lơh broă bal jrô ơnàng làm uă, ngan ngồn rlau tai bơh ală broă lơh tàm pơgơl mpồl kwang bàng mờ cribơyai jơnau tàm sră pơ àr; gàr niam lơh broă bal mờ pơgồp bal tàm ală dơ̆ cribơyai uă lơgar đảng cíñ trị mờ 2 Đảng là cau tàm mpồl, tàm hơ̆ geh Pơrjum ală Đảng Kộng sản mờ Cau lơh phan ală lơgar; lơh jat niam gơnoar broă bơh tơl Đảng kung bè ală Mpồl lơh bơyô bal tàm broă cribơyai jơnau yal tơngĭt, bơyai lơh ală broă lơh tìp mat lơh kwèng niam chài, tìp mat lơh kwèng làng bol nàng kờñ sơlơ tơnguh rlau tai bơta tam klăc bal mờ wă wờng bal mờ gơ̆p đah làng bol 2 lơgar; dong kờl mpồl bơtiàn cau Việt Nam mờ Phần Lan tàm tơl lơgar ơm kis, bơsram mờ lơh broă tàm lơgar do dê.