Tàm dơ̆ wă, Tổng Ƀí thư ồng Tô Lâm đơs tờm dơ̆ tus còp bơh Mpồl duh broă Dà lềng dê là cơng tàng geh cồng nha, mùl màl bơh bơta git gơ̆p đah bàr lơgar dê, tàm hơ̆ uă ngan là tàm broă lơh mùl màl jơh ală jơnau ring bal kấp dờng neh geh đah bàr lơgar dê.

Tổng Ƀí thư ồng Tô Lâm đơs nền lơgar Việt Nam là dùl lơgar jăt gah dà lềng, nàng lơh geh ală jơnau kờñ jŏ jòng bè bơtàu tơnguh dà lơgar tàm tơngai tus, lơgar Việt Nam pal gơs lơgar dà lềng pràn kơl dang, pơgồp bal niam tàm bơta ring lơngai, lơngăp lơngai, lơh broă bal mờ bơtàu tơnguh tàm tiah do mờ tàm dunia; sồr lơgar Nga mờ gơnoar broă là dùl lơgar dờng pràn geh uă jơnau mờng chài bè ală broă lơh tàm gah dà lềng rơ̆p dong kờl mờ lơh broă bal mờ lơgar Việt Nam tàm tơngu me geh kwơ bal, di pal mờ bơta git gơ̆p lơh bơyô bal ờs mờng mờ Tam klăc bal jŏ jòng tơl ală bơta đah bàr lơgar dê.