Tàm dơ̆ wă, Tổng Ƀí thư đơs là, bơta geh mat bơh gal ngan ală cau Việt Nam họk tàm lơgar mờ ală lơgar dê ai tơnggŏ dùl jơnau đơs kờñ pơyua kuơmàng ngan: Việt Nam ờ mìng là lơgar kơlôi sơnơng mờ neh gơ gơs dùl lơgar lơh broă bal bồ tơngoh jak bơh ală cau Việt Nam họk dê.

Tổng Ƀí thư ồng Tô Lâm ưn ngài mpồl bơtiàn ală cau Việt Nam họk neh lời ai bơta jơh nùs ai Việt Nam in tàm uă nam do, đơs bơta kơp kờñ ală cau geh jơnau git wă jrô, cau kơlôi sơnơng pơn jat tai lòt bal, ờ mìng mờ nùs nhơm mờ gam mờ bồ tơngoh git wă jak chài, mblàng broă lơh jat tàm cơng tàng jak chài, jơnau sồr, jơnau dan mùl màl, gơtùi lam lơh ngan ngồn. Bal mờ hơ̆, Tổng Ƀí thư kung kơp kờñ mờ sồr lơh ală jơnau kơlôi sơnơng bè Việt Nam rơp ngai sơlơ đềt mềr mờ bơta gam ai tơlik dồ bă jal mhar. Mờ bơta kơp kờñ dờng, mơya kung mờ nùs nhơm pơn dềt să, git iat, đòm jat, Tổng Ƀí thư ồng Tô Lâm đơs nền, Việt Nam sùm sền dờng màng tìp mat tơm boh bơr, lơh broă bal, ki ngàm adat boh lam ală lơgar, sền dờng màng rài lơh broă uă lơgar geh cồng nha, ring bal nàng bơt bơtàu dùl Việt Nam lơngăp lơngai is, brồ guh is, tam gơl pa bơceh lơh, bơtàu tơnguh mhar mờ kơnhăp jŏ tàm rài pa.