- “Ờ dờp đơng lam bồ lơh broă jat bồ tơngoh kơlôi sơnơng tơngai lơh broă, đơs uă lơh dồ ết, lơh kơryan bơta bơtàu tơnguh bơh Dà lơgar dê”. Do là jơnau đơs sùm bơh Tổng Ƀí thư ồng Tô Lâm dê, tàm Pơrjum pờ tơlik tơn tàm internet sền wơl bơta lam lơh jat Jơnau lơh nền tàm pơrjum sồ 57 bơh Ƀộ Cíñ trị dê bè tam gơl pa bơceh lơh, geh bơyai lơh ngai 15/10. Jat tàm ală jơnau đơs cribơyai, jơnau đơs, jơnau dan, Tổng Ƀí thư ồng Tô Lâm đơs loh nùs nhơm, broă lam lơh Jơnau lơh nền tàm pơrjum sồ 57 là bơta gơn kơnờm tờm nàng lơh jat geh cồng nha ală tam gơl pràn kwơ màng, tam gơl broă lơh bơtàu tơnguh Dà lơgar, lơh geh broă lơh gơguh lơh sa pa bơh Dà lơgar dê.

Tổng Ƀí thư sồr, ală Ƀộ, gah broă ală tiah pal ai broă tă bơsong bơta gơ kòl broă lơh lơh kơnòl broă tam gơl pràn lam lài; bơsong pràn kơl dang priă jền mpồl bơtiàn ai bơtàu tơnguh jak chài, măi mok, tam gơl pa bơceh lơh, jat jơnau pal jat “Ală bơta lơi tiah làng bol dê lơh sa is lơh geh mờ ờ gŏ di gah Dà lơgar gàr gơnoar tờm den lơh geh ală bơta, pơn jờng nàng tiah làng bol dê lơh is lơh”. Nùs nhơm là pal ai bơta niam nùs mờ bơta pin dờn bơh làng bol mờ mpồl lơh sa kă bro dê lơh bơta đo was, pal kràñ cê jơh nùs lơh tam gơl sồ tơl làm broă lơh, lam lơh drơng broă Dà lơgar “dùl mpồng- dùl dơ̆ yal”, tàm bơnàng jă ală jơnau ală gah dê.