Mang ngai 11/09, tàm Tokyo, Kwang atbồ anih lơh broă ala mat lơgar Việt Nam tàm lơgar Nhờk yŭ rơyùm bơyai lơh Dơ̆ tơngkah kir sơnrai 80 nam ngai Sơntờm  lơgar Kộng hoà sàh hội củ nghĩa củ nghĩa Việt Nam, mờ bơta tus bal bơh pơgăp 500 nă năc jà ala mat ai Cíñ phủ, ală anih lơh broă, mpồl lơh sa kă bro, ală tiah, mpồl yal tơngĭt jơnau lơgar Nhờk mờ ală anih lơh broă cribơyai broă mờ lơgar ndai lơgar Nhờk dê.

Đơs tàm dơ̆ bơyai lơh, Kwang atbồ anih lơh broă ala mat lơgar Việt Nam tàm lơgar Nhờk ồng Phạm Quang Hiệu đơs loh tŭ tơngai niam bơnĕ ngan 80 nam lài do mờ kwơ màng rlau jơh là ngai 2/9/1945 mờ gùng lòt bềng bơta bòl glar kal ke, mơya bềng bơta pơn yờ să mờ ală cồng nha lơh geh niam ngan bơh jơh jơi bơtiàn Việt Nam dê. Ala mat đah lơgar Nhờk, ồng Fukuyama Tetsuro - Phó Củ tịc Thượng viện lơgar Nhờk gờm chờ lơgar Việt Nam di tòm 80 nam Sơntờm Dà lơgar, tơngŏ bơta ki ngàm uă ngan mờ ală cồng nha lơh geh bơh lơgar Việt Nam dê neh lơh geh tàm tơngai pa do, mơkung đơs nền bơta kơ̆p kờñ lơh jrô ơnàng làm uă rlau tai bơta gĭt gơ̆p mờ lơgar Việt Nam tàm tơngai tus.