Tàm bàr ngai bơh ngai 16 tus 17 nhai 9, Duh broă sùm Mpồl duh broă Làng bol càr Lâm Đồng pơgồp bal mờ Vụ Lơh broă cau ala măt, Anih duh broă Lơh broă cau ala măt Quốk hội bơyai lơh Pơrjum bơsram tàp jơnau git wă ai ală cau ala măt Mpồl duh broă Làng bol kấp sàh nàng tơnguh uă jơnau ngăc ngar adăt boh lam, bơta chài lơh broă ai cau ala măt in.

Bơh broă lơh tơn mờ pờ tơlik tàm internet, Pơrjum bơsram tàp nàng tơnguh uă jơnau ngăc ngar adăt boh lam, bơta chài lơh broă ai cau ala măt Mpồl duh broă Làng bol kấp sàh càr Lâm Đồng dê. Pơrjum geh tơrbŏ bal bơh anih tờm tàm Dà Làc tus mờ 120 anih pờ tàm càr mờ geh 1 rơbô 720 nă cau ala măt tus bal. Ồng K’ Mák, Phó Củ tịc Mpồl duh broă Làng bol càr Lâm Đồng pà git, mùl màl tàm càr Lâm Đồng pà gŏ bơh tŭ broă lơh gơnoar atbồ ƀòn lơgar 2 kấp geh lơh mờ ờ gam kấp kơnhoàl tai, khà broă lơh bơh Mpồl duh broă Làng bol kấp sàh gơguh uă ngan, den tàng jơnau kờñ jal mhar bè broă tơnguh uă bơta pràn lơh broă kung bè jơnau git wă tàm lơh broă mùl màl nàng di pal mờ cồng nha ală kơnòl broă pa.