Quôk hội lơh nền chồl tơnguh khà gơguh kờp jơh phan lơh gơs tàm lơgar (GDP) pơnđơl pràn geh bơh 10% rlau hơđang, nàng kờñ lơh gơlik bơnàng jă kơnhăp kơ̆ ai gơguh lơh sa kơljap sùm tàm khà 2 nơm sồ tàm tŭ tơngai pa. Jơnau lơh nền tàm pơrjum đơs loh: Nam 2026 geh gơtha kuơmàng ngan, geh bơyai lơh Pơrjum dờng dơ̆ XIV bơh Đảng dê, bơyai lơh tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp, tơngai lơh broă bơh nam 2026 tus nam 2031, là nam sơn rờp lam lơh broă rơndap lơh bơtàu tơnguh lơh sa – mpồl bơtiàn 5 nam, bơh nam 2026 tus nam 2030; mut tàm rài brồ să bơtàu tơnguh pas pràn, pas sơm bơh jơi bơtiàn dê. Ai lài chồl tơnguh gơguh lơh sa bơh bơta gàr kơ̆ broă lơh sa dờng, gròi sền bơta roh giă priă, gàr niam ală bơta tàm pơnring dờng. Jơnau lơh nền tàm pơrjum kung git nền 15 broă jàu tờm ngan, tàm hơ̆: Khà gơguh lơh sa pơnđơl pràn geh bơh 10% rlau hơđang. Priă lơh geh dùl nă cau geh 5 rbô 400 dolar Mỹ. Khà hìu bơnhă rƀah (jat tơl khà rƀah uă gah) gơmù rlau 1%...

Bè broă lơh, Quôk hội sồr, pơn jat tai ai lài chồl tơnguh lơh sa gơ jat bal mờ gàr kơ̆ broă lơh sa dờng, gròi sền bơta roh giă priă mờ gàr niam ală bơta tàm pơnring dờng bơh rài lơh sa dê. Pơgồp bal nền nòn, geh cồng nha, ngac ngar đah broă lơh priă jền mờ ală broă lơh dờng ndai. Pơn jat tai lơh sir gùng dà, broă lơh, adat boh lam gơ rềng tus bơcri priă dà lơgar, bơsong ală bơta gơ kòl, bơta ờ niam nàng tơnguh mhar tơngai ai priă bơcri dà lơgar bơh bồ nam 2026 tơn, is ồn là ală rơndap broă lơh kuơmàng, rơndap broă lơh dờng dà lơgar dê mờ ală broă lơh jơnau kờñ dà lơgar.